काठमाडौँ । सत्तारुढ दल नेपाली कांग्रेसका प्रवक्ता डा. प्रकाशशरण महतले स्थानीय तहको निर्वाचनमा सत्तारुढ दलबीच नै प्रतिस्पर्धा हुन सक्ने बताएका छन् ।
एमालेले चुनाव हार्ने तर सत्तारुढ गठबन्धन दलबीच भने आफैंले चुनाव जित्छु भन्ने लागेमा त्यहाँ फ्रण्डेली प्रतिस्पर्धा हुने प्रवक्ता महतको भनाइ छ । शनिबार पार्टी केन्द्रीय कार्यालय सानेपामा जारी केन्द्रीय कार्य सम्पादन समितिको बैठक चलिरहेका बेला उनले गठबन्धन दलले भने कुनै पनि अवस्थामा एमालेसँग चुनावी तालमेल गर्न नमिल्ने गरी शीर्ष तहमा सहमति गरिएको स्पष्ट पारे ।
कुनै ठाउँमा गठबन्धन दलहरूबीच आ–आफ्नो दाबी रह्यो भने त्यहाँ चुनावी प्रतिस्पर्धा हुने प्रवक्ता महतले बताए । ‘कुनै ठाउँमा समझदारी हुन सकेन, त्यहाँ सबैको आ–आफ्नो दाबी रह्यो, मेरै त्यहाँ ज्याँदा शक्ति छ, मेरै जनाधार बढेको छ, हामीले नै जित्छौँ, र अर्को विपक्ष दल एमालेले जित्दैन भन्ने त्यस्तो स्थिति आयो भने त्यस्तो धेरै ठाउँमा आउन पनि सक्छ,’ उनले भने, ‘त्यस्तो ठाउँमा फ्रेण्डली प्रतिस्पर्धा हुन पनि सक्छ, तर एमालेसँग चाहिँ फेरि यहाँ हामी एकअर्कामा मिलेन भनेर गठबन्धन गर्न जाँदैनौँ ।’
प्रवक्ता महतले महानगर र उपमहानगरका मेयर, उपमेयरबाहेकका सबै स्थानीय तहको उम्मेदवार सम्बन्धित कमिटीकै गठबन्धनले तय गर्ने बताए । त्यहाँ कुनै समस्या भए तत्काल केन्द्रमा जानकारी गराउन पनि उनले स्थानीय गठबन्धन दललाई सचेत गराए ।
प्रवक्ता महतका अनुसार पार्टीको जारी केन्द्रीय कार्य सम्पादन समितिको बैठकमा महानगरका मेयर, उपमेयर तय गर्ने मोडालिटीको बारेमा छलफल भइरहेको छ ।
