भारतको पञ्जाब राज्यमा सरकार बनाएको एक महिनापछि आम आदमी पार्टी (आप)ले नागरिकलाई तीन सय युनिट बिजुली निःशुल्क दिने घोषणा गरेको छ।

घरेलु उपभोक्ताका लागि यो योजना १ जुलाईदेखि लागू हुनेछ। राज्यका मुख्यमन्त्री भागवन्त मानले शनिबार आफ्नो सरकार बनेको महिनादिन पुगेको अवसरमा यो घोषणा गरेका हुन्। पञ्जाबका सबै अखबारमा यो खबर शनिबार विज्ञापनका रूपमा प्राथमिकताका साथ प्रकाशित भएको छ।

आम आदमी पार्टीको सरकारले यस विज्ञापनलाई ‘३० दिनको रिपोर्ट कार्ड’ शीर्षकमा प्रकाशित गराएको छ। उक्त विज्ञापनमा एक महिनाभित्र के के काम भयो भनेर आप सरकारले जानकारी दिएको छ।

१ जुलाईदेखि ३०० युनिट बिजुली निःशूल्क उपलब्ध गराउने र घर–घरमा राशन बाँडिने उल्लेख छ। यस्तै, २५ हजार युवालाई रोजगारी उपलब्ध गराउने घोषणा पनि आप सरकारले गरेको छ। हाल करार सेवामा रहेका ३५ हजार युवालाई नियमित रोजगारीमा राखिने घोषणा पनि पञ्जाब सरकारको छ।

मुख्यमन्त्री मानले शनिबार राज्यका बासिन्दालाई सम्बोधन गर्दै सोही विषय दोहोर्‍याए। यस्तै, ३१ डिसेम्बर २०२१ सम्म दुई किलोवाट कनेक्सनको पुरानो बिजुलीको बिल पनि निःशूल्क गरिने घोषणा उनले गरे।