भर्खरै सत्ताबाट विस्थापित भएका पूर्वप्रधानमन्त्री इमरान खानको सरकार हटाउन अमेरिकी षडयन्त्रमा सहभागी भएको आरोप पाकिस्तानी सेनाले खण्डन गरेको छ। खानको सरकार अविश्वासको प्रस्तावपछि अपदस्थ भएको थियो ।
अमेरिकाको सल्लाह नमानेर मस्को भ्रमणमा गएकाले अमेरिका आफूलाई हटाउन लागिपरेको खानले आरोप लगाएका थिए। वासिङ्टनले पहिले नै यो आरोप खण्डन गरिसकेको छ।
इमरान खानले रुसले युक्रेनमाथि आक्रमण गरेकै दिन रुसी राष्ट्रपति भ्लादिमिर पुटिनलाई भेटेका थिए। खानले अमेरिकी षडयन्त्रलाई नागरिक नेता तथा सेना सम्मिलित मञ्च ‘नेसनल सेक्युरिटी कमिटी (एनएससी)’ले पनि समर्थन दिएको आरोप लगाएका थिए। सेनाका प्रवक्ता मेजर जनरल बाबर इफ्तिखरले यो आरोप खण्डन गरेका छन्।
एनएससीले यही महिना एक ‘विदेशी मुलुक’बाट आएको केबलमा अविश्वासको प्रस्तावबारे प्रयोग भएको गैर–कूटनीतिक भाषामाथि चासो दिएर वक्तव्य जारी गरेको थियो।
त्यसतर्फ संकेत गर्दै प्रवक्ता इफ्तिखरले भने, ‘पत्रमा एउटा पनि षडयन्त्रयुक्त शब्द परेको छ कि छैन तपाईं आफैंले हेर्न सक्नुहुन्छ।’ धेरैले सो पत्र अमेरिकाले पठाएको आशंका गरेका छन्।
खानको मन्त्रीमण्डलमा सूचना मन्त्री रहेका फवाद चौधरीले खानको सरकार अपदस्थ गर्न अमेरिकाबाट षडयन्त्र भएको आरोपमाथि छानविनका लागि न्यायिक आयोग गठन गर्नुपर्ने माग राखेका छन्।
पत्रकार सम्मेलनमा इफ्तिखरले अफगानिस्तान छाडेपछि अमेरिकाले पाकिस्तानमा सैन्य आधार शिविर राख्न कहिल्यै आग्रह नगरेको पनि बताए। खानले एक अन्तरवार्तामा अमेरिकी सेनाको आधार शिविर राख्ने प्रस्ताव ‘ठाडै अस्वीकार गरिदिए’पछि वासिङ्टन आफूविरुद्ध लागेको बताएका थिए।
अलजजिराबाट