कैलाली- धनगढी उपमहानगरपालिकाले किसानलाई पुष्प व्यवसाय सम्बन्धी तालिम दिएको दोश्रो बर्षमा नै धनगढी उपमहानगरपालिका फुलमा आत्मनिर्भर भएको छ।
उपमहानगरपालिकाले धनगढी क्षेत्रभित्र रहेका पुष्प व्यवसायी कृषकलाई फुल लगाउने तालिम सँगै फूलको बुके बनाउने विवाहका लागि गाडी सजाउने र अन्य शुभ कार्यमा सजावट गर्ने तालिम दिएको थियो ।
उपमहानगरले धनगढीलाई फूलमा आत्मनिर्भर बनाउने अभियान अन्तर्गत दिइएको तालिम पश्चात् अहिले किसानहरुले उत्पादन गरेको फूल धनगढी बाहित समेत निर्यात हुन थालेपछी उपमहानगरले लिएको लक्ष्य पूरा गरेको नगरप्रमुख गोपाल हमालले बताए ।
धनगढीमा कुनै शुभकार्य गर्नुपर्दा फूलका लागि भारतीय बजारको भर पर्नुपर्ने साथै पुजी पलायन समेत भइरहेको अवस्थामा यहाँका कृषकलाई नै तालिम किन नदिने भन्ने लक्ष्यका साथ गत बर्षबाट शुरु गरिएको तालिमले अहिले धनगढी मात्रै होइन यहाँका छिमेकी पालिका र काठमाडौंमा समेत फुल निर्यात भइरहेको मेयर हमालले बताए ।
यस्तै, कृषकको सहजताका लागि धनगढी उपमहानगरले फूलका लागि चिस्यान केन्द्र पनि बनाएको र त्यसको बिजुली र कर्मचारीको खर्च पनि उपमहानगर स्वयंले बेहोरिरहेको मेयर हमालले बताए ।
उपमहानगर क्षेत्रका कृषकले उत्पादन गरेको फूल काठमाडौं पढाउँदा हवाईजहाजको भाडा प्रति केजी २०० पर्न जाने भएकाले उपमहानगरले एयरलाइन्ससँग समन्वय गरेर किसानको सहजताका लागि अहिले ९० रुपैयाँ प्रति केजीका दरले हवाईजहाज मार्फत फूल काठमाडौं पठाइरहेको नगरप्रमुख हमालले बताएका छन् । उनले त्यो ९० रुपैयाँमा पनि ५० रुपैयाँ धनगढी उपमहानगरले भाडामा अनुदान दिइरहेको बताए ।
आफुले लगाएको फुल निर्वाध बिक्रीवितरण हुँदा किसान समेत दंग छन । धनगढी उपमहानगरपालिका- ६ मटियारीकी लक्ष्मी बिष्टले फुल बेचेर लगानी अनुसारको राम्रै आम्दानी भइरहेको बताइन् । उनले फुल बिक्रीका लागि अहिले कुनै झमेला नभएको बताउँदै धेरै जना त बारिमै फुल लिन आउने गरेको बताइन् ।
व्यवसायी र आम नागरिकले धनगढी क्षेत्रका नागरिकबाट फूल खरिद गरेर यहाँको फूल व्यवसायलाई स्थापित गर्नका लागि सहयोग गरिदिन हुन पनि नगर प्रमुख हमालले आग्रह गरेका छन्।
