काठमाडौँ । २५ वर्षीय अर्जुन दासको हत्यामा संलग्नलाई प्रहरी नयाँ वर्षको दिन पक्राउ गरेको छ । महानगरीय अपराध महाशाखाको टोलीले अर्जुनको हत्यामा संलग्न चार जनालाई पक्राउ गरेको हो ।

गत पुस ३ गते कैलाली जिल्लाको जानकी गाउँपालिका ९ अमरावती सामुदायिक वनमा सोही स्थानका अर्जुनको रूखमा बाँधेर खुकुरीको प्रयोग गरी घाँटी छिनाली विभत्स शैलीमा हत्या गरेका थिए ।

उनको हत्यामा संलग्न रहेर फरार सुमित साउद, बमे भनिने बम बहादुर बोहरा, रोनी परियार भनिने दिलिप दास र मनोज भण्डारी छन् । जानकी गाउँपालिका ९ कैलाली घर भएका सबै जना १९ वर्षीय उनका अर्जुनका साथीहरू नै हुन् ।

रूपन्देहीको सिद्धार्थ नगरपालिका १ बेलहिया सीमा नाकाबाट गोप्य सूचनाको आधारमा अपराध महाशाखाको विशेष टोलीले पक्राउ गरी जिल्ला प्रहरी कार्यालय कैलालीलाई बुझाएको हो । हिजो पक्राउ परेका उनीहरूलाई कर्तव्य ज्यान कसुरमा मुद्दा रहेकाले थप अनुसन्धानका लागि कैलाली प्रहरीलाई बुझाएको हो ।

यसरी पक्राउ परे ?

हत्या गरी भारततर्फ फरार भएका चारै जना लुकिछिपी बस्दै आएका थिए । भारतमा बसेर उनीहरूले फेसबुक लाइभमार्फत नेपालमा धम्की दिँदै आएका थिए । नेपालको प्रहरीले पक्राउ गर्न नसक्ने उनीहरूको दाबी थियो ।

नयाँ दिल्लीतर्फ लागेका उनीहरू पछिल्लो समय काम खोज्दै बेलहिया नाकातर्फ स्वदेश फर्किएका थिए । सुमित, मनोज, दिलीप र बमे बेहलिया नाकातर्फ आएको सूचना महानगरीय अपराध महाशाखाले पाएको थियो ।

त्यसपछि खटिएको विशेष टोलीले नयाँ वर्ष अर्थात १ वैशाखको ४ः१५ बजेतिर पक्राउ गरेको थियो । पक्राउ परेका उनीहरूलाई कैलाली जिल्ला प्रहरी कार्यालयमा बुझाएको छ ।

यसरी भएको थियो हत्या ?

घटना हुनुभन्दा तीन दिनअगाडि कमल साउदको मोबाइल फोन हराएको विषयलाई लिएर सुमित साउदलाई शंका गरी कुटपिट गरेको थिए । सुमित कुटिएको विषयमा मनोज भण्डारी र बमबहादुरले कमल साउदको २५ हजार रुपैयाँ बराबरको लागू औषध चोरी गरी जंगलमा लुकाएका थिए ।

अर्जुनले मोबाइल चोरी हर्के भाटलाई दिएको कुरा सुमितले पत्ता लगाएका थिए । पछि उक्त फोन कमललाई फिर्ता दिएका थिए । कमलको मोबाइल चोरी गरेको र सुमितलाई कुटपिट गरेको विषयमा मुख्य दोषी अर्जुन हो भनी मनोज, सुमित, बम, सुशील मयाल, दिलीप दास, बादल विक, करण दर्नालले कुट्ने योजना बनाएका थिए ।

गत पुस २ गते साँझ ६ बजेतिर अर्जुन र उनका साथीहरू लागु औषध सेवन गर्न उक्त सामुदायिक वनमा भेला भए । सबै जनाले लागु औषध सेवन गरेपश्चात कमलको चोरी भएको मोबाइल र सुमितलाई कुटपिट गरेको विषयमा अर्जुनलाई दोषी देखाई सबै मिलेर कुटपिट गरी हातखुट्टा बाँधेका थिए ।

अर्जुनलाई हातखुट्टा बाधेर ४–५ घण्टा राखेपछि सबै जनाको मार्ने योजनाअनुसार सुशील मयाल खुकुरी उपलब्ध गराएर घर फर्किएका थिए ।

सोही दिन राति ११ बजेतिर मनोजलगायतको समूहले अर्जुनलाई साजको रूखमा हातखुट्टा बाँधेर राखेका थिए । पछि उनीहरूले खुकुरी प्रयोग गरी घाँटी छिनाली विभत्स हत्या गरी टाउको दुई फिट टाढा राखी सबैजनाले लागु औषध सेवन गरेका थिए । उनीहरू रातभरि घटनास्थलमै बसेका थिए ।

भोलिपल्ट बिहान ५ बजेतिर मनोज, बादल, दिलीप, बमे, सुमित र विवेक भारतको दिल्लीतर्फ लागेका थिए । कनकलाल, करण, सुशील कैलालीमै साथीको घरमा लुकेर बसे ।

सुमित, मनोज, दिलीप र बमे भारतका विभिन्न स्थानमा बस्दै आएका थिए ।