काठमाडौँ । अख्तियार दुरुपयोग अनुसन्धान आयोगमा बाराबाट बढी उजुरी परेका छन् । सबैभन्दा बढी जिल्लाको जीतपुर सिमरा उपमहानगरपालिकाको रहेको तथ्यांकले देखाएको छ ।

अख्तियार दुरुपयोग अनुसन्धान आयोगको कार्यालय हेटौँडाका अनुसार बाराका १६ स्थानीय तहमध्ये आर्थिक वर्ष २०७७–७८ मा सबैभन्दा बढी जीतपुर सिमरा उपमहानगरमा ३६ उजुरी परेका छन् । सोअनुसार जीतपुर सिमरा उपमहानगरबाट सबैभन्दा बढी भ्रष्टाचार भएको देखाएको छ ।

चालु आव २०७८–८९ को फागुन मसान्तसम्ममा ४० उजुरी परेको आयोगले जनाएको छ । गत आव र चालु आवमा ३७ उजुरी फछ्र्योट गरिएको छ ।

यसैगरी बाराको कलैया उपमहानगरमा गत आव र चालु आवमा गरी ५४ उजुरी परेका छन् । यीमध्ये २९ उजुरी फछ्र्योट गरिएको आयोगले जनाएको छ ।

आयोगको क्षेत्राधिकारभित्र १५ जिल्ला पर्छन् । बाराबाट ३०४ उजुरी परेकामा १७५ फछ्र्योट गरिएको आयोगले जनाएको छ ।