आपराधिक हिंसात्मक समूहविरुद्ध कारवाही शुरु गरेको एलसाल्भाडोरले अढाइ साताको अवधिमा १० हजार शंकास्पद मानिस पक्राउ गरेको राष्ट्रपति नयिब बुकेलेले जानकारी दिएका छन्।

एलसाल्भाडोरको संसदले २७ मार्चमा देशमा बढ्दो ग्याङ हिंसा नियन्त्रण गर्न भन्दै संकटकाल लागू गरेको थियो। संकटकाल लागू हुनुअघिको सातामा आपराधिक ग्याङबाट ८७ जनाको हत्या भएको थियो।

संकटकाल लागू भएपछि देशभर ठूलो संख्यामा प्रहरी र सेना परिचालन गरिएको छ। यस अवधिमा नागरिकको भेला हुन पाउने अधिकार र कानूनी सल्लाहसुझावको अधिकार निलम्बित गरिएको छ।

मंगलबार बुकेले ट्विट गर्दै १७ दिनको अवधिमा १० हजार ९४ ‘आतकंवादी’ पक्राउ परेको बताएका छन्। ‘हामी ग्याङविरुद्धको युद्धलाई निरन्तरता दिनेछौं,’ बुकेलेले ट्विटमा लेखेका छन्।

संयुक्त राष्ट्रसंघीय मानव अधिकार उच्च आयुक्त र मानव अधिकार संगठनहरूले संकटकालीन समयमा बढेको सरकारी धरपकडप्रति प्रश्न उठाएका छन् ।

अल एल्भाडोरका दुई ठूला अपराधिक समूह मारा सल्भाट्रुचा (एमएस–१३) र बारियो १८ मा कुल ७० हजार सदस्य छन्। तीमध्ये हजारौं अहिले पक्राउ परेका छन्।

बुकेलेको सत्तारुढ पार्टीका सदस्यले हालै अपराधिक समूहका सदस्यहरूको जेल सजाय बढाउने कानून पारित गरेका छन् । नयाँ दण्ड सजायसम्बन्धी कानूनले आपराधिक ग्याङका नेताहरूलाई ४५ वर्षसम्म जेलको व्यवस्था गरेको छ, जुन पहिले नौ वर्ष मात्र थियो। आपराधिक ग्याङका अन्य सदस्यलाई भने २० देखि ३० वर्षसम्म जेलको व्यवस्था गरिएको छ, जुन पहिले तीनदेखि पाँच वर्ष थियो।

संकटकालीन व्यवस्था अनुरूप सञ्चार माध्यमहरूलाई आपराधिक समूहलाई समर्थन गर्न कुनै पनि समाचार प्रसारण गर्न रोक लगाइएको छ। यसप्रति अमेरिकासमेत कैयौं मुलुक तथा संस्थाले चिन्ता व्यक्त गरेका छन्।
अमेरिकी विदेश मन्त्री एन्टोनी ब्लिंकेनले आफूहरू एलसाल्भाडोरको आपराधिक ग्याङविरुद्धको लडाईंलाई समर्थन गर्ने बताउँदै सरकारलाई आधारभूत नागरिक अधिकारको सम्मान गर्न आग्रह गरेका छन्।

सोमबार अमेरिकी सरकारलाई संकेत गर्दै बुकेले क्रुद्ध प्रतिक्रिया दिएका छन्। पूर्वअमेरिकी राष्ट्रपति डोनाल्ड ट्रम्पले आफूहरूलाई समर्थन गरेको तर अहिलेको बाइडेन प्रशासनले अपराधीहरूको ‘मानव अधिकार’को मात्र ख्याल गरेको टिप्पणी उनले गरेका छन्।