झापा– झापाबाट एकै दिन १० जना सडक मानवको उद्दार भएको छ। झापालगायत देशैभरका जिल्लालाई सहयोगापेक्षी सडक मानवमुक्त गर्ने उद्देश्यले शुरु गरिएको यो अभियानको पहिलो दिन १० जना सडक मानवको उद्दार भएको नेपाल मानव सेवा केन्द्रले जनाएको छ।

मानवसेवा आश्रम र आनी छोइङ डोल्मा फाउन्डेसनको संयुक्त आयोजनामा शुरु भएको उद्वार अभियानका उद्वार टोलीले झापाको मेचीनगरबाट सडक मानवको उद्वार कार्यको सुरुवात गरेको हो। यो कार्यलाई तिव्र बनाइने केन्द्रले जनाएको छ।
सडकआश्रित मानवलाई स्वास्थ्य उपचार, संरक्षण र पारिवारिक पुर्नमिलन गराउने उद्देश्यले सडक आश्रित मानवको उद्दार शुरु भएको हो। सोमबार एकै दिन झापाका विभिन्न पालिकाबाट १० जना सडक मानवको उद्दार भएको मानव सेवा आश्रमका संस्थापक अध्यक्ष रामजी अधिकारीले बताए।

‘यो पटकको चाडपर्वमा कसैले बस्न नपरोस् सडकपेटीमा’ भन्ने मूल नाराका साथ ३२ दिनसम्म यो अभियान संचालन हुने छ। उद्वार टोलीमा करिब ४० परिचालक परिचालित छन्। स्थानीय तहको समन्वयमा सडकआश्रित मानवको उद्दार हुने गरेको आश्रमले जनाएको छ।

आश्रमका अनुसार मेचीनगर नगरपालिकाबाट ४ जना, बिर्तामोड नगरपालिकाबाट २ जना, कन्काई नगरपालिकाबाट २ जनाको र शिवसताक्षी नगरपालिकाबाट २ जनाको उद्वार गरिएको हो। उद्वार भएका सडकआश्रित मानवहरूको आजै झापाको बाहुनडाँगी स्थित मानवसेवा केन्द्रमा गृहप्रवेश गराइने छ।

झापाको शिवसताक्षीबाट उपप्रमुख नरमाया कार्की, गौरिगञ्ज गाउँपालिकाकी उपाध्यक्ष पुजन कुवर न्यौपाने, शिवसताक्षी नगर १० नम्बर वडाका अध्यक्ष हर्क सिगु, पत्रकार विनोद सापकोटालगायतको टोलीले सडक मानवको उद्दार गरि मानवसेवा आश्रमको टोलीलाई बुझाएको थियो।

सडकपेटी, पौवा, मठ मन्दिर, चौतारामा बेवारिसे अवस्थामा बस्दै आएका मानवलाई केन्द्रले उद्दार गर्ने गरेको छ। झापामा असंख्य रुपमा सडक मानव छन्। उनिहरूले राम्रोसंग औषधोपचार, खानपान र बसोबास गर्न पाएका छैनन्। पारिवारीक कलहका कारण घर छोडेर हिडेका, परिवारका सदस्यबाट अपहेलित भएका, आफन्त नातागोता कोही नभएका, हराएका मानवलाई मानवसेवा आश्रमले उद्दार गर्ने गरेको छ।

मानवसेवा आश्रमले सातै प्रदेशका १९ वटा जिल्लामा २५ वटा सेवाकेन्द्र विस्तार गरेको संस्थापक अध्यक्ष अधिकारीले बताए। सहयोगापेक्षी सडकआश्रित मानवहरूको उद्धार, उपचार, संरक्षण तथा सुन्दर पारिवारिक पुनर्मिलन गराउदै आएको सो संस्थाले जनाएको छ। मानव सेवा आश्रम विगत १२ वर्षदेखि संचालित मानवीयता प्रवर्द्धनमा महत्वपूर्ण भूमिका खेल्दै आएको गैरनाफामूलक सामाजिक संस्था हो।

यसअघि ३ वटा मेची-महाकाली राष्ट्रिय उद्धार यात्रा सम्पन्न भइसकेको छ। पहिलो मेची-महाकाली राष्ट्रिय उद्धार यात्रामा ७५८ जना र अघिल्लो वर्ष भएको मेची महाकाली राष्ट्रिय उद्धार यात्रामा ३०४ जनाको उद्धार भएको सो संस्थाले जनाएको छ।

यसपटकको मेची-महाकाली राष्ट्रिय उद्धार यात्राले मानवसेवा आश्रमले ८२ सालभित्र सहयोगापेक्षी सडकआश्रित मानवमुक्त राष्ट्र निर्माण गर्न लिएको संकल्पलाई थप टेवा पुग्ने बताइएको छ।

साथै भोलि मंगलबार मोरङ जिल्लाको पथरी, बेलबारी, विराटनगरमा उद्वार सेवा संचालन हुनेछ।