कैलाली- दशैं नजिकिएसंगै सुदूरपश्चिम प्रदेशको कैलाली, कंञ्चनपुरस्थित थारु गाउँमा सखिया नाचको रौनक बढेको छ।
दशैंको चहलपहलसँगै यहाँका थारु बस्तीमा सखिया नाचको रौनक बढेको हो। थारु समुदायमा विशेष गरेर दशैंमा सखिया नाच नाच्ने गरिन्छ। दशैंको बेला गाउँको रौनकता बढाउनका लागि हरेक वर्ष सखिया नाच नाचिने गरेको धनगढी उपमहानगरपालिका–५ जाईका भलमन्सा कुलवीर चौधरीले बताए । उनले सखिया नाचले गाउँमा दशैं आएको समेत संकेत गर्ने बताए ।
जाईमामात्रै नभई, यहाँका थारु बाहुल्य अन्य गाउँमा पनि बालिकादेखि लिएर वयस्क महिलासम्म एकसाथ सखिया नाच नाचिरहेका छन्। यति बेला थारु बस्तीमा सखियाको पैयाँ लगाउँदा मादल र मजिराको आवाजले छुट्टै रौनक थपिएको छ।
आफ्नो मौलिक संस्कृति जोगाउन र नयाँ पुस्तालाई सिकाउनका लागि आफूहरूले सखिया नाच्ने गरेको जाईकी दिलमाया चौधरीले बताइन् । ‘यसो गर्दा रमाइलो पनि हुने र नयाँ पुस्तामा संस्कृति हस्तान्तरण पनि’, उनले थपिन , ‘हामी जानेकाले नै हो नयाँ पुस्तालाई सिकाउने हो। त्यो काम हामीले नगरे कस्ले गर्ने त ?’
महिलाहरूले मादलको तालमा मजिरा बजाउँदै सखिया नाच नाच्ने गर्दछन्। यो नाचमा सुरुमा गीत गाउने गरेको उल्लेख गर्दै मादल वादक स्थानीय रामप्रसाद दहितले भने,“त्यसपछि रमाइलोका लागि पैयाँ लाग्ने गरिन्छ।”
सखिया नाच कृष्ण लीलामा आधारित गीत गाएर नाच्ने गरेको जनाइएको छ। यो नृत्य अट्वारी पर्व सकिएपछि नै शुरु गर्ने गरिए पनि कार्यव्यस्तताका कारण अचेल दशैंको अवसरमामात्रै नाच्ने गरिएको छ ।
