चरम आर्थिक संकटबाट गुज्रिरहेको श्रीलंका ५१ अर्ब अर्ब डलर विदेशी ऋण चुक्ता गर्न असफल भएको छ।

समाचार एजेन्सी एएफपीको रिपोर्टअनुसार कठिन आर्थिक स्थितिबाट उकासिन श्रीलंकासामु विदेशी ऋण नतिर्नुको विकल्प थिएन। किनकि, श्रीलंकाको राज्यकोषमा विदेशी मुद्रा सञ्चित छैन।

श्रीलंकाले इतिहासमै कठोर आर्थिक स्थिति सामना गर्नु परिरहेको छ, जहाँ खाद्य पदार्थदेखि इन्धनसम्म समाप्त भएका छन्।

ऋणदाता मुलुक र संस्थाहरू व्याजलाई साँवामा जोड्ने या श्रीलंकाको मुद्रामा भुक्तानी लिन स्वतन्त्र रहेको त्यहाँको अर्थ मन्त्रालयले विज्ञप्तिमार्फत बताएको छ। ‘देशको वित्तीय स्थितिलाई थप बिग्रिन नदिनका लागि सरकारले आपतकालीन उपायका रूपमा यो कदम उठाउन विवश भएको छ,’ मन्त्रालयले भनेको छ।

अन्तर्राष्ट्रिय मुद्रा कोषबाट राहत प्याकेज उपलब्ध हुनुअघि सबै ऋणदाताको भुक्तानीलाई ‘डिफल्ट’ गरिएको मन्त्रालयले जनाएको छ। र, त्यसमा कसैमाथि भेदभाव नगरिएको बताएको छ। आर्थिक संकटका कारण श्रीलंकाका दुई करोड २० लाख जनसंख्याको मुस्किल बढेको छ । र, सरकारविरोधी प्रदर्शन पनि तीव्र भएको छ।

अन्तर्राष्ट्रिय रेटिङ एजेन्सीहरूले गत वर्ष श्रीलंकाको रेटिङ यति कम गरिदिएका थिए कि त्यसका कारण श्रीलंकाका लागि विदेशी पुँजी बजारबाट उधारो प्राप्त गर्न पनि असम्भव भएको छ। त्यसपछि श्रीलंकाले भारत र चीनबाट आर्थिक सहायता माग्यो। तर, दुवै मुलुकले उधारोमा दिने प्रस्ताव मात्र गरेका छन्।