अर्थमन्त्री जनार्दन शर्माले राष्ट्र बैंकका गभर्नर महाप्रसाद अधिकारीलाई गरिएको निलम्बन कानूनसम्मत रहेको जिकिर गरेका छन्।
अर्थ मन्त्रालयमा सोमबार पत्रकार सम्मेलन गर्दै मन्त्री शर्माले उनका गतिविधि छानविन गर्न समिति गठन गरिएकाले त्यसको रिपोर्ट आएपछि धेरै कुरा स्पष्ट हुने दाबी गरे। छानविन समितिले काम गरिरहेकाले त्यस विषयमा धेरै नबोल्ने उनले बताए।
अनुत्पादक क्षेत्रमा कर्जा प्रवाहबारे पटक–पटक सचेत गराउँदा पनि गभर्नरबाट सुनुवाइ नभएको उनको भनाइ थियो।
अर्को प्रसंगमा देश श्रीलंकाको बाटोमा रहेको बताउँदै अफवाह फैलाइएको दाबी गरे। एमाले अध्यक्ष केपी ओलीको नाम नलिई उनले सरकारले वृद्धभत्ता दिन नसक्ने भन्दै अफवाह फैलाइएको बताए।
सरकारी खर्च कटौति गर्न इन्धन प्रयोग घटाउने प्रस्ताव क्याबिनेटमा पुगेको उनले बताए। र, सार्वजनिक विदाका दिन सरकारी सवारी साधन प्रयोग नगर्ने प्रस्ताव रहेको खुलाए।
हल्ला चलाइएजस्तो नेपालको अर्थतन्त्रमा ठूलो संकट नआएको उनको दाबी थियो। तथ्यांकहरूबाट अर्थतन्त्रमा संकट आएको नदेखिने दाबी पनि उनको छ। अर्थतन्त्रलाई लिएर राजनीति गर्न नहुने उनको सुझाव थियो।
अछामका पृथ्वीबहादुर शाहको अमेरिकाबाट आएको ४० करोडबारे मुख खोल्दै उनले उनलाई अन्याय परेको होला भनेर सहजीकरण गरिएको दाबी गरे।
‘एक दिन एउटा मान्छे निवेदन दिन आएको थियो। रुँदै आएर रोएर मेरो यस्तो भयो भनिसकेपछि गल्ती गरेको होला नि भन्दा होइन, यहाँ छानविन छ भनेर भनिसकेपछि बुझिदिनुस् भनेर मैले पठाउनु मेरो कर्तव्य हो,’ उनले भने, ‘एउटा मन्त्रीको नागरिकले आएर भन्ने कुरालाई बुझ्नोस्, सहजीकरण गर्नूस्, सम्भव कुरा गरिदिनूस् भन्नु अन्यथा होइन।’