भारतको मार्क्सवादी कम्युनिस्ट पार्टीमा सीताराम यचुरी तेस्रोपटक महासचिव निर्वाचित भएका छन्। उक्त पार्टीको ५७ वर्षको इतिहासमा दलित समुदायका एक नेता पोलिटब्युरो सदस्य चुनिएका छन्।
केरलाको कुन्नुरमा सम्पन्न उक्त पार्टीको २३औँ राष्ट्रिय सम्मेलनबाट यचुरी लगातार तेस्रोपटक महासचिव चुनिएका हुन्। राष्ट्रिय सम्मेलनबाट निर्वाचित प्रतिनिधिलाई सम्बोधन गर्दै यचुरीले आफ्नो पार्टीको लक्ष्य भाजपालाई अलग–थलग गरेर पराजित गर्नु रहेको बताए। ‘फासीवादी’ राष्ट्रिय स्वयंसेवक संघ (आरएसएस)मार्फत भाजपाले ‘हिन्दुत्वको साम्प्रादायिक एजेन्डा’लाई बढावा दिइरहेको उनले बताए।
भारतमा धर्मनिरपेक्ष लोकतान्त्रिक गणतन्त्रलाई बचाउनु आफ्नो पार्टीको मुख्य एजेन्डा रहेको उनले बताए। केवल मानवीय स्वतन्त्रता आफ्नो उद्देश्य रहेको उनको भनाइ थियो।
उक्त पार्टीको पोलिटब्युरोमा १७ र केन्द्रीय समितिमा ८५ सदस्य चुनिएका छन्। उनीहरूको कार्यकाल तीन वर्षको हुन्छ।
यस्तै, उक्त पार्टीको इतिहासमै पहिलोपटक पश्चिमबंगालबाट दलित समुदायका नेता रामचन्द्र डोम पोलिटब्युरो सदस्य चुनिएका छन्। र, उनी उक्त पार्टीको पोलिटब्युरोमा पुग्ने पहिलो दलित नेता बनेका छन्। उक्त पार्टी तत्कालीन कम्युनिस्ट पार्टी अफ इन्डियाबाट टुक्रेर ७ नोभेम्बर १९६४ मा स्थापना भएको हो।
पोलिटब्युरोमा अन्य दुई नयाँ अनुहार आएका छन्, वाम लोकतान्त्रिक मोर्चाका संयोजक ए विजयराघवन र अल इन्डिया किसान सभाका अध्यक्ष अशोक धवले।
यस्तै, ७५ वर्ष पुगेका वरिष्ठ नेता रामचन्द्रन पिल्लई, विमान बोस र हन्नान मोल्लालाई पोलिटब्युरोबाट हटाइएको छ। ८५ सदस्यीय केन्द्रीय समितिमा १७ जना नयाँ अनुहार छन्। केन्द्रीय समितिमा १५ महिला सदस्य चुनिएका छन्।