युरोपियन युनियन (ईयू)ले युक्रेनको राजधानी किभमा फेरि दूतावास खोलेको छ। युक्रेनमाथि रुसको आक्रमण शुरु भएपछि ईयूले आफ्नो दूतावास पोल्यान्डमा सारेको थियो।

ईयूका विदेश नीति प्रमुख जोसेप बुरेलले शुक्रबार किभमा दूतावास खोल्ने घोषणा गरेका थिए। उनी अहिले किभको भ्रमणमा छन्।

युक्रेनका प्रधानमन्त्री डेनिस स्माइहलसँगको वार्तालापपछि बुरेलले यस्तो घोषणा गरेका हुन्। निकट भविष्यमै ईयू-युक्रेन एसोसिएसन काउन्सिल बनाउने तयारी शुरु भएको घोषणा पनि उनले गरेका छन्।

युक्रेनमा ईयू प्रतिनिधि मण्डल प्रमुख म्याटी मासिकासले किभमा ईयूको झण्डाको तस्बिर ट्विट गरेका छन्। र, किभमा कूटनीतिक नियोगको फिर्तिको संकेत दिएका छन्।

इटालीले पनि इस्टरपछि किभमा पुनः दूतावास खोल्ने तयारी थालेको छ। इटालीका विदेशमन्त्री लुइगी माइलोले समाचार एजेन्सी अन्सासँग त्यसको पुष्टि गरेका छन्।