काठमाडौँ । निर्वाचन आयोगले आज रातिदेखि निर्वाचन आचार संहिता लागु गर्ने भएको छ । आगामी वैशाख ३० गते हुने स्थानीय तह निर्वाचनको आचार संहिता आज मध्यरातिदेखि लागु हुने भएको हो ।
आचार संहिता पालना गर्ने प्रतिबद्धता पत्रमा राजनीतिक दलहरूलाई हस्ताक्षर गराइसकेको आयोगले आज मध्यरातिदेखि मतदानको दिनसम्म कार्यान्वयन गर्न लागेको हो ।
आचार संहिता लागु भएसँगै कुनै पनि दल वा उम्मेदवारको पक्षमा भड्किलो प्रचार प्रसार गर्न रोक लाग्ने भएको छ । स्थानीय प्रशासनको अनुमति नलिई सार्वजनिक स्थानमा सभा, जुलुस, बैठक, भेला लगायतका काम गर्न पनि बर्जित हुन्छ । कुनै कार्यक्रम गर्नुभन्दा ७२ घण्टा अगाडि प्रशासन र प्रहरीलाई जानकारी दिनु पर्ने हुन्छ ।
यसैगरी योजनाको शिलान्यास, उद्घाटनसहित कर्मचारी नियुक्ति, सरुवा, पदस्थापनलगायत काम गर्न पाइँदैन । दलको निर्वाचन चिह्न, झण्डा अंकित लोगो, स्टिकर, कपडा, टोपी, भेस्ट, टिसर्ट, ज्याकेट, कमिज, गम्छा, ब्याच, मास्क, लकेट बोक्न पाइने छैन ।
प्रचार प्रसारका लागि हेलिकप्टर प्रयोग गर्न पाइने व्यवस्था गरिएको छ । तर, दुई दलका मुख्य प्रचारक मात्र हेलिकप्टरमा हुनुपर्छ ।
यस्तै, साइकल, रिक्सा, ठेलागाडा, बयलगाडा, टाँगालगायतका सवारी साधन चुनाव प्रचारमा प्रयोग गर्न नपाइने निर्वाचन आचार संहितामा उल्लेख छ ।