दुई छिमेकी मुलुकहरू भारत र चीनमा कोरोना संक्रमणको फरक परिस्थिति छ। भारतमा केही दिनयता कोरोना संक्रमितको संख्या निरन्तर ओरालो लागिरहेको छ भने चीनमा त्यो संख्या बढ्दो छ।
भारतमा ७१५ दिनपछि पहिलोपटक सोमबार एक हजारजनामा कोरोना संक्रमण पुष्टि भएको छ। भारतको केन्द्रीय स्वास्थ्य मन्त्रालयका अनुसार सोमबार सक्रिय संक्रमितको संख्या ७१४ दिनयताकै कम देखिएको छ। हाल भारतभर सक्रिय संक्रमितको संख्या १३ हजारभन्दा कम छ। यस्तै, यस अवधिमा संक्रमणले १३ जनाको मृत्यु भएको छ।
भारतमा हालसम्म चार करोड ३० लाख २९ हजार ४४ जनामा कोभिड-१९पुष्टि भइसकेको छ। यसैगरी, पाँच लाख २१ हजार ३५८ जनाको संक्रमणले मृत्यु भएको छ। संक्रमणले मृत्यु भएका कुल संख्यामध्ये ७० प्रतिशतलाई अन्य प्रकारका स्वास्थ्य समस्या रहेको मन्त्रालयले जनाएको छ।
भारतमा लगातार कोभिड-१९ का बिरामी संख्यामा कमी आइरहे पनि चीनमा भने पुनः कोरोना संक्रमणमा वृद्धि भइरहेको छ।
सोमबार चीनमा १६ हजार ५९० जनामा कोरोना संक्रमण पुष्टि भएको छ। तीमध्ये एक हजार २३५ संक्रमितमा लक्षण पनि देखिएको छ। त्यसबाहेक १५ हजार ३३५ जनामा कुनै लक्षण देखिएको छैन। चीनको व्यावसायिक शहर सांघाईमा धेरैजनामा संक्रमण पुष्टि भएको हो।
चिनियाँ सरकारले विच्याटको आधिकारिक एकाउन्टद्वारा दिइएको जानकारीअनुसार मंगलबार सांघाईमा १३ हजार ८६ जनामा कोभिड-१९ पुष्टि भएको हो। तीमध्ये २६८ जनामा कोभिडका लक्षण देखिएका छन्।