काठमाडौं- महिनावारी हुँदा सरसफाइमा धेरै ध्यान दिनुपर्छ । दुईदेखि तीन घण्टाभित्रमा प्याड परिवर्तन गरिरहनुपर्छ ।
– कपडाको प्याड प्रयोग गरिएको छ भने राम्रोसँग धुने। लामो समय एउटै कपडा प्रयोग नगर्ने।
– सफा पानीले नियमित रूपमा यौनांग सफा गर्ने
– धेरै दुखाइ छ भने आराम गर्ने
– महिनावारी हुँदा पेट, कम्मर दुखेमा हटवाटर ब्यागले दुखेको भागमा सेक्ने
– प्रशस्त मात्रामा पानी पिउने
– महिनावारी हुँदा तरल पदार्थ बढी सेवन गर्ने र नियमित रूपमा आइरन, भिटामिन र पोषणयुक्त खानेकुरा खाने
– धेरै दुखाइ, वाकवाकी हुनेलगायत समस्या देखिएमा चिकित्सकको सल्लाहअनुसार औषधि सेवन गर्ने
– नियमित व्यायाम गर्ने
– धेरै तनाव नलिने
– महिनावारी हुँदा धेरैजसो महिलालाई पेट दुख्ने, वाकवाकी लाग्ने समस्या हुन्छ। शरीरबाट रगत बग्ने हुँदा प्रशस्त मात्रामा पानी पिउने, झोलिलो तथा पोषिलो खानेकुरा खानुपर्छ।
के खाने, के नखाने ?
महिनावारीको समय अल्कोहल सेवन गर्नु हुँदैन। यसले विभिन्न समस्या सिर्जना गर्न सक्छ। जस्तो- यसले शरीरमा इस्ट्रोजेनको लेभल बढाइदिन्छ, जसकारण महिनावारी अनियमित हुन सक्छ।
चिया-कफीको सेवन पनि कम गर्नुपर्छ। किनकि, यसमा क्याफिनको मात्रा अधिक पाइन्छ, जसले महिनावारीमा हुने दुखाइलाई बढाउँछ र मुड स्विङ गराउँछ। राम्रो निद्रा नलाग्न सक्छ।
अत्यधिक चिनीको सेवनबाट पनि बच्नुपर्छ। चिनीले पनि पेट दुखाउँछ। त्यसैले, केक, कुकिज नखाँदा राम्रो हुन्छ। अत्यधिक चिल्लो खानेकुरा कम गर्नुपर्छ।
जस्तो- बोसोयुक्त मासु। यस्ता खाद्यान्नको सेवनले पेट सुन्निन सक्छ। यसको साटो तपाईं चिल्लो कम भएका खानेकुरा लिन सक्नुहुन्छ। जंकफुड नखाने, यसले पेट गडबड गर्न सक्छ। फलफूल प्रशस्तै खानुपर्छ।