कैलाली– धनगढी उपमहानगरपालिकाले प्रसुति सेवाका लागि शुरु गरेको निःशुल्क एम्बुलेन्स सेवाबाट थुप्रै आमाहरूको जीवन रक्षा गरिएको छ। ‘आमा बचाउ’ अभियान कार्यक्रमअन्तर्गत उपमहानगरपालिकाले प्रसुति सेवाका लागि निःशुल्क एम्बुलेन्सको व्यवस्था गरेको हो। आमा र शिशुको जीवन रक्षाका लागि शुरु गरिएको ‘आमा बचाउ’ अभियान कार्यक्रमबाट अहिलेसम्म सयौं आमाहरूले सेवा लिइसकेका छन।
ग्रामीण क्षेत्रका नागरिकको स्वास्थ्य अवस्थालाई मध्यनजर गर्दै उपमहानगरपालिकाले २०७९ पौष २१ गतेबाट शुरु गरेको ‘आमा बचाउ’ अभियान कार्यक्रमबाट अहिलेसम्म १९ वडाबाट ४५४ जना आमाहरूले निःशुल्क एम्बुलेन्स सेवा प्राप्त गरेको उपमहानगरपालिकाले जनाएको छ।
नगरप्रमुख गोपाल हमालले ‘प्रसूति’ सेवाका लागि अस्पतालसम्म निःशुल्क एम्बुलेन्सको व्यवस्था गरिएको बताए। सुत्केरी आमालाई अस्पतालसम्म पुर्याउनका लागि चारवटा एम्बुलेन्सको व्यवस्था गरिएको बताउँदै नगरप्रमुख हमालले समयमा उपचार नपाएर आमा र बच्चाको जीवन खतरामा नपरोस् भन्नका लागि यो सेवा शुरु गरिएको बताए।
‘आमा बचाउ’ कार्यक्रमका लागि उपमहानगरले दुईवटा एम्बुलेन्स तयारी अवस्था राखेको मेयर हमालले बताए। उनले एम्बुलेन्स प्रयोग गरेवाफत कुनै शुल्क तिर्नु नपर्ने बताउदै विशेष गरी उपमहानगरपालिका भित्रका ग्रामीण भेगका गर्भवतीलाई लक्षित गरी यस्तो सेवा सुरु गरिएको बताए।
उपलब्ध स्रोतसाधनको अधिकतम उपयोग गरेर स्वास्थ्य सेवा सुधारको क्षेत्रमा काम गर्दै आएको उपमहानगरपालिकाले ग्रामीण क्षेत्रमा आर्थिक रुपमा विपन्न गर्भवतीले समयमा उपचार नपाउँदा ज्यान जाने सक्ने अवस्थालाई ध्यानमा राख्दै निःशुल्क एम्बुलेन्स सेवा सुरु गरिएको बताएको छ।
