काठमाडौं- काठमाडौं गोकर्णेश्वर नगरपालिका-१ सुन्दरीजलस्थित सडकमा बा.४ ख ६९६५ नम्बरको टिपरले बा.५१ प ८७३३ नम्बरको मोटरसाइकललाई बुधबार बिहान ठक्कर दिँदा टिपरको टायर मुनी च्यापिएर मोटरसाइकलमा सवार २ जनाको घटनास्थलमै मृत्यु भएको छ । मृत्यु हुनेहरूमा मोटरसाइकल चालक सोही ठाउँ बस्ने ३० वर्षीय रोहन तामाङको छोरीहरू ९ वर्षीया सृया तामाङ र ४ वर्षीया सृष्टी तामाङ रहेका छन् । साथै दुर्घटनामा घाइते भएका रोहनको नेपाल मेडिकल कलेज अत्तरखेलमा उपचार भइरहेको छ । टिपर चालकलाई प्रहरीले नियन्त्रणमा लिएको छ ।

महोत्तरी सोनमा गाउँपालिका-८ शिवनगरस्थित खेतमा अनटेष्ट लेखिएको ट्याक्टरले रोटाभेटर लगाई खेत जोत्ने क्रममा ट्याक्टरबाट लडेर सोही ठाउँ बस्ने कलाम हुसेनका छोरा ५ वर्षीय अकसर अलीको बुधबार दिउँसो मृत्यु भएको छ । ट्याक्टरबाट लडेर रोटाभेटरमा परी उनको घटनास्थलमै मृत्यु भएको हो । हाल फरार ट्याक्टर चालकको प्रहरीले खोजी गरिरहेको छ ।