काठमाडौं- विश्व शान्तिका लागि खटिने नेपाली शान्ति सेनाको संख्या १ लाख ५२ हजार नाघेको छ।
संयुक्त राष्ट्र संघको शान्ति मिसनअन्तर्गत शान्ति स्थापना कार्यमा साढे ६ दशकको अवधिमा १ लाख ५२ हजार ८१८ शान्ति सैनिकहरू संसारभरका विभिन्न ४४ वटा शान्ति मिसनमा खटिएका सेनाले जनाएको छ।
सेनाको जनसम्पर्क तथा सूचना निर्देशनालयले ३ साउनमा वार्षिक गतिविधिबारे जानकारी गराउन पत्रकार सम्मेलन आयोजना गरेको थियो। शान्ति कार्य निर्देशनालयका प्रमुख सहायक रथी प्रेमबहादुर पुनका हाल संयुक्त राष्ट्रसंघमा शान्ति स्थापनार्थ फौज तैनाथी गर्ने राष्ट्रहरूको संख्यात्मक मर्यादाक्रममा नेपाल पहिलो स्थानमा पुगेको छ।
हाल विश्वमा ११ देशमा नेपाली सेनाका ५ हजार ९१६ शान्ति सैनिकहरू तैनाथ रहेको सहायक रथी पुन बताउँछन्। उनका अनुसार सैनिक पर्यवेक्षक र स्टाफ अधिकृतसहित ६७४ जना नेपाली महिला शान्ति सैनिकहरू यूएनका विभिन्न मिसनहरूमा खटिएका छन्। हालसम्म २ हजार ७०७ महिला सैनिकहरू शान्ति सैनिकको रूपमा खटिइसकेका छन्।
शान्ति सेनामा महिला सैनिकको योगदानमा पनि नेपाल पहिलो स्थानमा पुगिसकेकको सहायक रथी पुन बताउँछन्। भन्छन्, ‘शान्ति सेनामा महिला सैनिकहरूको योगदानमा संख्यात्मक हिसाबले नेपाल पहिलो स्थानमा छ, जुन विश्व शान्ति स्थापनामा नेपालले गर्व गर्ने विषय हो।’
३० जेठ ०१५ मा पहिलोपटक यूएनओजीआईएलमा ५ सदस्यीय सैनिक पर्यवेक्षकहरूको तैनाथीसँगै नेपाली सेनाको शान्ति स्थापना मिसनमा सहभागिताको शुरुवात भएको थियो। ०३१ सालमा संयुक्त राष्ट्रसंघको आह्वानमा सेनाको पहिलो युनिटको रूपमा पुरानो गोरख गण इजिप्टमा तैनाथ भएको थियो।
हालसम्मको अवधिमा कर्तव्य पालनाको सिलसिलामा ७३ नेपाली सैनिकहरूले ज्यान गुमाएका र ६८ सैनिक घाइते भएका सहायक रथी पुनले जानकारी दिए।