कैलाली– पूर्वमुख्यमन्त्री तथा नेपाली काँग्रेस संसदीय दलका नेता कमलबहादुर शाहले मुख्यमन्त्री दीर्घबहादुर सोडारीले नैतिकताका आधारमा तत्काल पदबाट राजिनामा दिनुपर्ने बताएका छन्।
सरकारलाई समर्थन गर्ने मुख्य पार्टी नेकपा एमालेले समर्थन फिर्ता लिईसकेपछि अल्पमतमा परेका सोडारीलाई मुख्यमन्त्रीको पदमा बसिरहन छुट नभएको शाहले बताए।
‘कानुनी प्राबधान हेरेर ३० दिन कुर्सीमा बसिरहने होईन, उहाँले राजनैतिक परिस्थितिलाई हेर्नुपर्छ,’ शाहले भने, ‘उहाँले बहुमत गुमाईसक्नु भएको छ। र, बहुमत प्राप्त गर्न सक्ने अवस्था पनि छैन। तसर्थ यस्तो अवस्थामा राजिनामा दिएर मार्ग प्रशस्त गर्नुपर्छ।’
यसअघि आफू र नेकपा एमालेका तर्फबाट मुख्यमन्त्री रहेका राजेन्द्रसिंह रावलले विश्वासको मत लिन अन्तिम समय कुर्सीमा बसेको आरोपको खण्डन गर्दै शाहले भने, मेरो हकमा नागरिक उन्मुक्ति पार्टीले समर्थन गरिसकेको अवस्थामा मैले विश्वासको मत पाउने अवस्था थियो। अन्तिममा समयमा उन्मुक्तिका दुई जना प्रदेश सभाका सदस्यले मत नदिदा पद छोड्नु परेको हो। रावलको हकमा पनि नागरिक उन्मुक्तिका सांसदले मत नदिदा पदबाट बाहिरिनुपर्यो। तर सोडारीको हकमा त विश्वासको मत पाउने अवस्था नै छैन।
नेपाली काँग्रेस संसदीय दलका नेता शाहले प्रदेश सरकारले ल्याएको बजेट कुनै पनि हालतमा पास नहुने बताए। उनले भने, ‘बिचौलियाले बनाएको यो बजेट बिचौलिया पास गर्दैनौं।’ उनले बिधि र प्रकृया बिपरित गोप्य रातो किताब सार्वजनिक भएको विषयमा उच्चस्तरीय छानबिन समिति गठन गर्नुपर्ने अडान कायम रहेको बताए।
नेकपा एमाले संसदीय दलकी उपनेता सन्तोष शर्माले एमालेले समर्थन लिएपछि कामचलाउ मुख्यमन्त्री बनेका सोडारीले तत्काल राजिनामा दिनुपर्ने बताईन। उनले बिचौलिया मार्फत बजेट निर्माण भएकोले बजेट हुबहु पास नहुने बताईन।
नागरिक उन्मुक्ति पार्टीका संसदीय दलका नेता घनश्याम चौधरीले बहुमत गुमाईसकेका मुख्यमन्त्री सोडारीले बजेट पास गर्न नसक्ने र बहुमत समेत गुमाईसकेको अवस्थामा तत्काल नैतिकताका आधारमा राजिनामा दिनुपर्ने बताए।