अमेरिकी राष्ट्रपति जो बाइडेनले रुसी राष्ट्रपतिलाई ‘कसाही’को संज्ञा दिँदै ‘उनी शक्तिमा रहन नसक्ने’ बताएका छन् । पोल्यान्ड भ्रमणको क्रममा बाइडेनले रुसविरुद्ध यस्तो कडा टिप्पणी गरेका हुन्।
बाइडेनको ‘पुटिन सत्तामा रहन नसक्ने’ भनाइले अन्योल सिर्जना गरेपछि अमेरिकी राष्ट्रपति कार्यालय ह्वाइटहाउसले बाइडेनको भनाइको अर्थ रुसमा ‘सत्ता परिवर्तन गर्नुपर्ने भन्ने नरहेको’ स्पष्टीकरण दिएको छ।
चार दिने युरोप भ्रमणको अन्तिम गन्तव्यका रूपमा बाइडेन पोल्यान्ड पुगेका थिए। त्यहाँ उनले युक्रेनी शरणार्थीका अतिरिक्त युक्रेनी अधिकारीसँग पनि भेटघाट गरेका थिए। पोल्यान्डमा बाइडेनले वार्साको चर्चित रोयल क्यासलअघि सम्बोधन पनि गरे।
सम्बोधनका क्रममा पुटिनविरुद्ध निकै आक्रामक रूपमा प्रस्तुत भएका बाइडेनले युक्रेनी युद्ध मस्कोका लागि ‘रणनीतिक हार’ भएको र आफूहरू युक्रेनको साथमा रहेको बताएका थिए। साथै बाइडेनले नेटो मुलुकको ‘एक इन्च’ भूमि पनि अतिक्रमण नगर्न चेतावनी दिए।
सोही सम्बोधनको अन्तिममा बाइडेनले पुटिनलाई संकेत गर्दै ‘यो मान्छे शक्तिमा रहन सक्दैन’ भनेका थिए।
रुसी राष्ट्रपति कार्यालयले बाइडेनको टिप्पणीलाई खारेज गरेको छ। ‘रुसमा को राष्ट्रपति बन्ने भन्ने कुरा बाइडेनले निर्णय गर्ने विषय होइन। रुसको राष्ट्रपति रुसी मतदाताले चुन्छन्,’ क्रेमलिनका प्रवक्ता दिमित्री पेस्कोभले रोयटर्स समाचार एजेन्सीलाई बताए।
ह्वाइट हाउसले पछि बाइडेनको भनाइको अर्थ स्पष्ट पार्दै भन्यो, ‘राष्ट्रपति बाइडेनले रुसमा सत्ता परिवर्तनको आह्वान गरेका होइन। उनले खासमा ‘पुटिनलाई रुसका छिमेकी वा रुस वरपरका क्षेत्रमा शक्ति अभ्यास गर्न दिन सकिँदैन भन्न खोजेका थिए।’
चार दिने युरोप भ्रमणलाई बाइडेनले रुसविरुद्ध पश्चिमी शक्तिलाई एकताबद्ध बनाउने प्रयास गरेको देखियो। भ्रमणमा उनले जी–७ को बैठक, युरोपेली परिषद तथा नेटोको बैठकसम्ममा सहभागिता जनाउन भ्याए।
अलजजिराबाट