काठमाडौँ । तीन दिनका लागि नेपाल भ्रमणमा रहेका चिनियाँ विदेशमन्त्री वाङ यीले आज शीर्ष नेताहरूसँग भेटघाट गर्ने भएका छन् । उनले आज राष्ट्रपति विद्यादेवि भण्डारीसँग पहिलो भेट गर्ने भएका छन् ।
राष्ट्रपति निवास शितल निवासमा पुगेर वाङले भण्डारीसँग शिष्टाचार भेटवार्ता गर्ने छन् । त्यसपछि उनी सीधै मेरियट होटल पुग्ने छन् । त्यहाँ उनले प्रमुख प्रतिपक्षी दल नेकपा एमालेका अध्यक्ष केपी शर्मा ओली र सत्ता गठबन्धन दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेटवार्ता गर्ने भएका छन् ।
अध्यक्ष ओलीसँग उनले बिहान ११ः१० देखि ११ः४० बजेसम्म भेट गर्ने भएका छन् । लगत्तै उनी माओवादी केन्द्रका अध्यक्ष प्रचण्डसँग भेटवार्ता गर्ने छन् ।
प्रचण्डसँग विदेशमन्त्री वाङले बिहान ११ः४५ देखि दिउँसो १२ः१५ बजेसम्म भेट गर्ने भएका छन् । ओली र प्रचण्डसँग भेटवार्ता गरी उनी आफू बसेको होटल द्वारिकाजमा आउने छन् ।
उनी आजै दिउँसो २ः५५ मिनेटमा त्रिभुवन विमानस्थलबाट स्वदेश फिर्ता हुने कार्यक्रम रहेको छ । उनलाई बिदाई गर्न परराष्ट सचिव भरतराज पौडेल, नेपालका लागि चिनियाँ राजदूत यान्छी, डा. दुर्गाबहादुर सुवेदीलगायत उपस्थित हुने भएका छन् ।