नयाँ दिल्ली- बिहीबार भारत भ्रमण गरेका चिनियाँ विदेशमन्त्री वाङ यीले प्रधानमन्त्री नरेन्द्र मोदीसँग भेट्ने प्रस्ताव राखेको तर मोदीको कार्यालयले अस्वीकार गरिदिएको तथ्य सार्वजनिक भएको छ।
भारतीय पत्रिका ‘द इन्डियन एक्सप्रेस’का अनुसार चीनले आफ्ना विदेशमन्त्री वाङको भारत भ्रमणका क्रममा मोदीसँग भेटघाटको प्रस्ताव राखेको थियो। तर, चीनको प्रस्तावलाई साउथ ब्लक (नयाँ दिल्लीको सेक्रेटरी बिल्डिङस्थित भारतीय प्रधानमन्त्रीको कार्यालय, रक्षा र विदेश मन्त्रालय रहेको हिस्सा)ले अस्वीकार गरेको हो।
भारतको प्रधानमन्त्री कार्यालयले प्रधानमन्त्री मोदी उत्तर प्रदेशका नवनिर्वाचित मुख्यमन्त्री योगी आदित्यनाथको सपथ ग्रहण समारोहमा सहभागी हुन लखनऊ जाने पूर्वनिर्धारित कार्यक्रम रहेकाले वाङसँग भेट्न नसक्ने जानकारी दिएको थियो।
विदेशमन्त्री वाङ झण्डै दुई वर्षपछि भारत भ्रमणमा आएका थिए। यस भ्रमणको बारेमा पहिले कुनै घोषणा गरिएको थिएन। मन्त्री वाङ बिहीबार राति ८ः४५ मा दिल्ली ओर्लिएका थिए भने शुक्रबार दिउँसो ३ बजे भारतबाट नेपाल आएका थिए।
द इन्डियन एक्सप्रेसले स्रोतलाई उद्धृत गर्दै चीनले भारतका राष्ट्रिय सुरक्षा सल्लाहकार अजित डोभाललाई चीन भ्रमणको आमन्त्रित गरेको जनाएको छ। निमन्त्रणालाई डोभलले सकारात्मक प्रतिक्रिया दिएको पत्रिकाले आफ्नो स्रोतलाई उद्धृत गर्दै लेखेको छ। डोभलले दुई देशबीच विद्यमान समस्या समाधान भएपछि आफूले चीन भ्रमण गर्ने बताएका छन्।