काठमाडौँ । स्थानीय तहको आसन्न निर्वाचन गर्न पार्टीको तयारीलगायत विषयमा छलफल गर्न नेकपा एमालेको केन्द्रीय कमिटीको तेस्रो बैठक आजदेखि काठमाडौँमा बस्दै छ ।

बबरमहलस्थित एक ब्याङ्क्वेटमा बिहान ११ बजेदेखि हुने बैठकमा अध्यक्ष केपी शर्मा ओलीको राजनीतिक प्रतिवेदन, महासचिव शङ्कर पोखरेलको सांगठनिक प्रतिवेदन, प्रदेशका अध्यक्षको रिपोर्टिङ, चुनावी घोषणा पत्र, उम्मेदवार चयनका मापदण्डलगायत कार्यसूची छन् ।

बैठकले हालै पार्टी प्रवेश गरेका विभिन्न व्यक्तिलाई जिम्मेवारी दिने बताइएको छ । बैठक बिहीबारसम्म चल्ने छ । यही चैत ७ गते सम्पन्न पोलिटब्यूरो बैठकले केन्द्रीय कमिटीका लागि कार्यसूची तय गरेको थियो ।