निर्वाचन आयोगको आचारसंहितामा उल्लेखित पालिकाका जनप्रतिनिधिले आगामी निर्वाचनमा उम्मेदवार बन्न पदबाट राजीनामा दिनुपर्ने व्यवस्था तत्काल कार्यान्वयन नगर्न सर्वोच्च अदालतले अल्पकालीन अन्तरिम आदेश जारी गरेको छ।

आसन्न पालिका चुनावका लागि आयोगले सार्वजनिक गरेको आचारसंहिताको बुँदा नम्बर २६ तत्काल कार्यान्वयन नगर्न सर्वोच्चले आदेश दिएको हो। उक्त व्यवस्थाविरुद्ध सिन्धुपाल्चोक हेलम्बू गाउँपालिका अध्यक्ष निमा ग्याल्जेन शेर्पाले सर्वोच्चमा रिट दायर गरेका थिए।

न्यायाधीश बमकुमार श्रेष्ठको इजलासले अल्पकालीन अन्तरिम आदेश दिएको हो। जनप्रतिनिधिले पदमा बहाल रहेर पालिका चुनावमा भाग लिन पाउनुपर्ने माग शेर्पाको रिटमा गरिएको छ। सर्वोच्चले यस मुद्दामा झगडिया झिकाउने आदेश पनि दिएको छ। त्यो भनेको दुवै पक्षलाई छलफलका लागि बोलाउने आदेश भएको हो।