काठमाडौँ । त्रिभुवन विश्वविद्यालयको सेवा आयोगले उपप्राध्यापक पदको लिखित परीक्षा स्थगित गरेको छ। सर्वोच्च अदालतले पदपूर्ति गर्ने कार्य हाललाई स्थगित गर्नु भन्ने अल्पकालीन अन्तरिम आदेश जारी गरेसँगै परीक्षा स्थगित हुने भएको हो।

सेवा आयोगले एक सूचना जारी गर्दै यही ८ गतेदेखि लिइने भनिएको परीक्षा हाललाई स्थगित गरिएको जनाएको छ।

‘सम्मानित सर्वोच्च अदालतबाट विज्ञापन नं ७०१–०७७–०७८ देखि ८२५–०७७–०७८ सम्मको पदमा पदपूर्ति गर्ने कार्य हाल नगर्नु–नगराउनु भन्ने अल्पकालीन अन्तरिम आदेश प्राप्त भएको हुँदा आयोगको निर्णय बमोजिम उक्त परीक्षा हाललाई स्थगित गरिएको छ,’ सूचनामा भनिएको छ, ‘सम्मानित सर्वोच्च अदालतबाट अर्को आदेश प्राप्त हुनासाथ परीक्षा तालिका प्रकाशित गरिने ब्यहोरा सम्बन्धित सबैमा जानकारी गराइन्छ।’