काठमाडौँ । नाबालिग गायिकालाई बलात्कार गरेको अभियोगमा प्रहरी हिरासतमा रहेका अभिनेता पल शाहको बैंक खाता रोक्का गरिएको छ । उनको पैसा भएको दुईवटा बैंक खाता रोक्का गर्न जिल्ला सरकारी वकिलको कार्यालय, नवलपुर पूर्वले अदालतसमक्ष पेश गरेको हो ।

बिहीबार जिल्ला अदालत, नवलपुर पूर्वमा दर्ता गरिएको मुद्दाको अभियोग पत्रमा पीडितलाई क्षतिपूर्ति दिलाउन शाहको बैंकमा भएको रकम रोक्का राख्न सम्बन्धित बैंकमा आदेश गरिदिन माग गरिएको छ । शाहको बैंक खाता विवरणअनुसार ग्लोबल आईएमई बैंकमा १६ लाख १० हजार २९१ रुपैयाँ र एनएमबी बैंकको खातामा ४ लाख २५ हजार रुपैयाँ रहेको देखिएको छ ।

शाहबाट अपराध पीडित संरक्षण ऐन, २०७५ को दफा ४१ बमोजिमको रकम सोही ऐनको दफा ४१ (५) अनुसार पीडित राहत कोषमा जम्मा गरी पाउने व्यवस्था गर्न पनि अभियोगपत्रमा भनिएको छ ।

पलविरुद्ध नवरपुर र तनहुँमा उजुरी परेको थियो । सरकारी वकिलले हिजो नवलपरासी बर्दघाट सुस्ता पूर्वमा बलात्कार मुद्दा दर्ता गरेको छ ।