धनगढी– कैलालीको धनगढी उपमहानगरपालिका प्रकृति संरक्षण अवार्डबाट सम्मानित भएको छ। उपमहानगरलाई विश्व प्रकृति कोष (डब्लूडब्लूएफ) नेपालले वातावरण संरक्षणको क्षेत्रमा उल्लेख्य भूमिका निभाएको भन्दै प्रकृति संरक्षण अवार्ड प्रदान गरेको हो।
नेपाल सरकारका वन तथा वातावरण मन्त्री नवल किशोर साह सुडीले काठमाडौमा एक कार्यक्रमका बिच धनगढी उपमहानगरपालिकाका प्रमुख गोपाल हमाललाई अवार्ड प्रदान गरेका हुन।
डब्लूडब्लूएफ नेपालले आफ्नो ३१ औँ स्थापना दिवसका अवसरमा उपमहानगरपालिकालाई नगद १ लाख सहित अवार्ड प्रदान गरेको जनाएको छ।
धनगढीले वातावरण संरक्षणअन्तर्गत प्लास्टिक बिक्री वितरणमा रोक, वृक्षारोपण, पानी पुनरभरण, सर्प तथा जीवजन्तुको सकुशल उद्धार गरी सम्बन्धितको वास स्थानमा छोड्ने लगायतका क्षेत्रमा काम गर्दै आएको छ।
धनगढीलाई ‘जिरो वेस्ट सिटिज नेटवर्क’को सदस्यता
ग्लोबल अलायन्स फर इन्सिनिरेसन अल्टरनेटिभ्सबाट धनगढी उपमहानगरपालिकालाई सदस्यता प्राप्त भएको छ। फोहोरमैलाको उचित व्यवस्थापन गरेको भन्दै धनगढीलाई “जेरो वेस्ट सिटिज नेटवर्क” संस्थापक सदस्यता मिलेको हो।
उपमहानगरपालिकाले फोहोरमैला व्यवस्थापनसम्बन्धी गरिरहेको प्रयास एवं स्वच्छतासम्बन्धी पहललाई कदर गर्दै जेरो वेस्ट सिटिज नेटवर्कको फाउन्डेसन मेम्बरको सदस्यता मिलेको धनगढी उपमहानगरपालिकाले जनाएको छ।
जेरो वेस्ट सिटिज नेटवर्कमा हालसम्म विश्वका ५५० सहर आबद्ध छन्। नेपालका धनगढीसहित काठमाडौंको गोकर्णेश्वर नगरपालिका र सिन्धुलीको दुधौली नगरपालिका पनि यसमा आबद्ध छन्।
