नयाँदिल्ली- विश्वमा ३४ करोड मानिस अर्थराइटिस अर्थात हाडजोर्नी सुन्निने समस्याबाट पीडित छन्। विश्व स्वास्थ्य संगठनका अनुसार कतिपयमा त्यसको गम्भीर र कसैलाई मोडरेट प्रकारको समस्या देखिएको छ।

अमेरिकाको सेन्टर फर डिजिज कन्ट्रोल एन्ड प्रिभेन्सनका अनुसार अर्थराइटिस १०० भन्दा बढी प्रकारको हुन्छ। र, त्यसको उपचार पनि प्रकारअनुसार फरक हुन्छ।

रुमेटाइड अर्थराइटिस ३० देखि ५० वर्षका व्यक्तिमा बढी देखिन्छ। टिन एजर्स र बालबालिकामा पनि यो समस्या देखिएको छ। तथापि, अर्थराइटिसको समस्या ५० देखि ६० वर्ष उमेर समूहका व्यक्तिमा बढी देखिन्छ। महिलामा भने ४० देखि ५० वर्ष समूहकालाई यसको समस्या बढी देखिएको छ।

जोर्नीको दुखाइ, जोर्नी सुन्निनेजस्ता आम लक्षण हुन् यसका। अर्थराइटिसको मुख्य कारण बुढ्यौली नै हो। तथापि, बुढेसकाल लागेका सबैलाई यसको समस्या देखिँदैन।

प्राकृतिक खानेकुराले यसबाट छुटकारा पाउन सकिन्छ। केमिकलयुक्त खानेकुराले यसको जोखिम बढाउँछन्। हाम्रो मुभमेन्ट कति छ भन्ने कुराले पनि यो समस्या देखिने-नदेखिने तय गर्छ।

अर्थराइटिस भएका मानिसमा फिजिकल थेरापी, न्युट्रिसन रिच डाइट र मोटोपन घटाउनेलगायत उपचार विधि छन्। त्यतिबाट नभएमा मात्र दुखाइ कम गर्ने औषधि चलाइन्छ। खासगरी, शरीरको भार खुट्टाका जोर्नीमा पर्ने भएकाले मोटोपन घटाउनु मुख्य उपाय हो।

खानामा फल र सब्जीको मात्रा बढाउन, फाइबरयुक्त खानेकुरामा जोड दिन चिकित्सकहरूले सल्लाह दिने गरेका छन्। यस्तै, नियमित शारीरिक अभ्यासले पनि तौल नियन्त्रित रहन्छ। र, यसको समस्या कम हुन्छ।

हाडजोर्नीहरूलाई चोटबाट बचाउनु पनि यसबाट बच्ने अर्को उपाय हो। सन्तुलित भोजनले सबै प्रकारका बिरामीबाट टाढा राख्छ। तनाव व्यवस्थापन पनि अर्को उपाय हो। धुम्रपान तत्काल छोड्नु अत्यावश्यक छ। शरीरलाई हाइड्रेड राख्न दैनिक ८ देखि १० गिलास पानी पिउनु आवश्यक हुन्छ। त्यसबाट पनि हाडजोर्नी सुन्निने कम हुन सक्छ।