कैलाली– विपन्न परिवारका बालबालिकाहरुको लागि विद्यालय पोसाक तथा पाठ्य सामग्री खरिदका लागि भनेर धनगढी उपमहानगरपालिकाले शुरु गरेको आर्थिक सहयोग अभियानमा हालसम्म विभिन्न संघसंस्थाले १४ लाख रुपैया सहयोग गरेका छन।
धनगढी उपमहानगरले ग्रामीण क्षेत्रका विद्यालयलाई छनौट गरी नमुना विद्यालय बनाउन पहल चालेको छ। ती विद्यालयमा अध्ययनरत छात्रछात्राहरु आर्थिक अभावका कारण ड्रप आउट हुन नपरोस् भनेर नगरप्रमुख शैक्षिक सुधार कोष स्थापना गरिएको छ।
धनगढी उपमहानगरले मात्र शिक्षामा लगाउन नसक्ने भएकोले विपन्न परिवारका बालबालिकाहरुको शैक्षिक गुणस्तर सुधार्न आफूले सक्ने जति नगरप्रमुख गोपाल हमालले शैक्षिक सुधार कोषमा सहयोग गर्न सबैलाई आग्रह गरेका छन्।
अहिलेसम्म काठमाडौंको कलंकीस्थित एलआरआई स्कुलका संस्थापक शिवराज पन्तले पाँच लाख, माछापुच्छ्रे बैंक धनगढी शाखाले ४ लाख ९८ हजार ७५०, हिमालयन बैंक धनगढी शाखाले एक लाख ९९ हजार ५००, महालक्ष्मी बैंकले १ लाख ५० हजार र प्रभु बैकले ५२ हजार पाँचसय रुपैयाँ सहयोग गरेको मेयर हमालको सचिवालयले जानकारी दिएको छ।
सहयोग गर्ने सम्पुर्णलाई धन्यवाद दिदै मेयर हमालले धनगढीका विपन्न परिवारका बालबालिकाहरूको शैक्षिक गुणस्तर सुधारका लागि सवैलाई सक्दो सहयोग गर्न आग्रह गरेका छन।