कैलाली- सुदूरपश्चिम प्रदेशका मुख्यमन्त्री दीर्घबहादुर सोडारीले विश्वासको मतका लागि तेस्रोपटक मिति तोकेका छन्।

यसअघि वैशाख २१ र २२ मा मुख्यमन्त्री सोडारीले विश्वासको मतको तयारी गरेका थिए।

एमालेले तत्काल विश्वासको मत नदिने भएपछि अन्तिम समयमा उनी पछि हटे र अर्को सूचना जारी नहुँदासम्मका लागि बैठक स्थगित गरिएको थियो।

अहिले फेरि ३ जेठमा विश्वासको मत लिन प्रदेश सभा बैठक आह्वान गरिएको छ। प्रदेश सभा सचिवालयका अनुसार ३ जेठ बिहीबार बिहान सवा १० बजे प्रदेश सभाबाट विश्वासको मत लिन बैठक आह्वान गरिएको छ।

एमालेले भने अझै विश्वासको मत दिने विषयमा निर्णय गरिसकेको छैन। ४ जेठसम्म मुख्यमन्त्री सोडारीले विश्वासको मत लिइसक्नुपर्ने संवैधानिक व्यवस्था छ।