काठमाडौं– सुदूरपश्चिमका दुई राष्ट्रिय तेक्वान्दो खेलाडी वीरबहादुर महरा र निरज देउवाले आइतबार २० औँ वाटा ओपन अन्तर्राष्ट्रिय तेक्वान्दो प्रतियोगिता २०२४ मा नेपाललाई रजत पदक दिलाएका छन्।
जापानको ओसाका शहरमा रहेको साकाइस्थित ओहामा स्टेडियममा भएको प्रतियोगितामा साग स्वर्णधारी महरा जापानका खेलाडीसँग हारेर रजत पदकमा चित्त बुझाउन बाध्य भए।
७४ केजी मुनि तौल समूहमा महराले जापानका कुरोडा कोहेलाई हराएर फाइनलमा स्थान बनाएका थिए तर उनी उपाधि भिडन्तमा जापानकै ताकाटो काटोसँग ८-१७, ५-४ मा स्तब्ध भए। पहिलो राउन्ड गुमाएपछि महराले दोस्रो चरणमा अन्तिम समयसम्म ४-२ ले अग्रता बनाएका थिए।
तेस्रो निर्णायक चरणमा अग्रसर सो खेलमा अन्तिम समयमा आफ्नो ध्यान गुमाउँदा जापानी खेलाडीले तीन अङ्क हासिल गरी खेल आफ्नो पक्षमा पारे।
यसैगरी ८७ केजी माथि निरज जापानका मिनागावा तोरुसँग १२-८, ६-४ ले हारे। निरजले पनि दोस्रो चरणमा अग्रता बनाएपनि अन्तिम समयमा सम्हाल्न नसक्दा आफूभन्दा निकै अग्ला जापानी खेलाडीसँग पराजय व्यहोरेका हुन्।
जापान वाटाको आयोजना तथा अल जापान तेक्वान्दो संघ र ओसाका तेक्वान्दो संघको सहयोगमा आयोजित दुई दिने प्रतियोगितामा २४ देशका खेलाडीको सहभागिता थियो।