रुसले अमेरिका, युरोपियन युनियनलगायत मुलुकको प्रतिबन्धका कारण विदेशी मुद्रा र सुनको आधा भण्डार गुमाएको छ।
रुसले आइतबार मात्र पश्चिमा मुलुकको प्रतिबन्धबाट देशको अर्थतन्त्र जोगाउन चीनसँग सहयोग लिने बताएको छ। प्रतिबन्धहरूका कारण आफ्नो सुन र विदेशी मुद्राको आधा भण्डार फ्रिज भएको प्रष्ट पारेको छ।
‘हामीसँग अहिले चिनियाँ मुद्रा युआनमा सुन र विदेशी मुद्रा भण्डारको एक हिस्सा मात्र छ,’ रुसका अर्थमन्त्री एन्टोन सिलुआनोभले भने, ‘पश्चिमा मुलुकले हाम्रो चीनसँगको व्यापारलाई पनि खुम्च्याउन कस्तो दबाब सिर्जना गर्छन् भन्ने हामी हेरिरहेका छौँ। पक्कै पनि उनीहरूले दबाब सिर्जना गर्ने छन्।’
चीनसँगको साझेदारीबाट अहिलेको अवस्थालाई सहज बनाउन मद्दत पुग्ने मन्त्री सिलुआनोभको दाबी छ। पश्चिमा बजार बन्द भइरहँदा चीनसँग व्यापारको हिस्सा पनि बढाउन सकिने उनको आकलन देखिन्छ।
युक्रेनको सार्वभौमिकतामाथि ठाडो हस्तक्षेप गर्दै रुसले २४ फेब्रुअरीमा आक्रमण थालेयता पश्चिमा मुलुकले रुसमाथि आर्थिक प्रतिबन्ध दिनानुदिन कडा बनाउँदै लगेका छन्। रुसको दाबी भने फरक छ। युक्रेनमाथि विशेष सैन्य अभियान सञ्चालन गरेको दाबी रुसी राष्ट्रपति भ्लादिमिर पुटिनले गर्दै आएका छन्।