काठमाडौँ । सरकारले विभिन्न विधामा उत्कृष्ट काम गरेका सात वटा नगरपालिका पुरस्कृत गरेको छ । नेपाल नगरपालिका संघको २९ औँ साधारणसभाको अवसरमा उत्कृष्ट नगरपालिकालाई पुरस्कृत गरेको हो ।

नगरपालिका संघले गरेको मूल्यांकनका आधारमा संस्थागत विकासतर्फ स्याङ्जाको वालिङ र पुतलीबजार पुरस्कृत भएका छन् । त्यस्तै सहरी योजना तथा विपद व्यवस्थापनमा धादिङको निलकण्ठ नगरपालिका पुरस्कृत भएको छ ।

वन, वातावरण र जलवायु परिवर्तन तथा उत्थानशीलताको क्षेत्रमा इलाम नगरपालिका उत्कृष्ट बनेको छ । स्थानीय स्रोत परिचालनमा सर्लाहीको हरिवन नगरपालिका उत्कृष्ट भएको छ भने सामाजिक विकासमा रुपन्देहीको तिलोत्तमा नगरपालिका र चितवनको राप्ती नगरपालिका उत्कृष्ट भएका छन् ।

प्रधानमन्त्री शेरबहादुर देउवाले उत्कृष्ट नगरपालिकाका मेयरलाई प्रमाण पत्रसहित पुरस्कृत गरेका थिए ।