काठमाडौं- अनुहारलाई सुन्दर देखाउन तथा घाम, धुलो र धुवाँबाट छालामा हुने असर कम गर्न मेकअप गरिन्छ। सामान्य मेकअप गर्दा पनि क्लिन्जिङ, टोनिङ र मोस्चराइजिङ दैनिक गर्नुपर्छ।
मेकअप कसरी गर्ने र कस्ता सामग्री प्रयोग गर्ने भन्नेमा हामीले ध्यान दिनुपर्छ। यदि प्रशाधनका सामानको सही प्रयोग गरिएन भने छालामा विभिन्न समस्या देखिन सक्छन्।
असर
– सस्तो तथा बजारमा पाइने जस्तोसुकै मेकअपका सामान प्रयोग गर्नेहरूमा छालामा एलर्जीको समस्या हुन्छ।
– म्याद गुज्रेका कस्मेटिक प्रयोगमा ल्याउँदा छालामा संक्रमण हुने सम्भावना उच्च रहन्छ। हेभी मेकअप मोडेल (जुन बेहुली र विशेष पार्टीका लागि पनि गरिन्छ) को नियमित प्रयोग गर्नु हुँदैन।
– दैनिक प्रयोगमा ल्याउने मेकअप हलुका हुनुपर्छ। अन्यथा छाला नराम्रो देखिने, एलर्जी देखिने, पछि गएर दाग बस्ने, घाउ भएमा संक्रमण हुने समस्या हुन्छन्।
– अरूले प्रयोगमा ल्याएका सामानहरू प्रयोग गर्दा छालाको समस्या हुने डर हुन्छ।
– छाला नरम बनाउने मेकअपका सामानहरूमा पोलिइथाइलिन ग्लाइकोल पेग नामक रसायन राखिएको हुन्छ, जुन सबै प्रकृतिका छालाका लागि उपयुक्त नहुन सक्छ। जथाभावी प्रयोग गर्दा छालामा इन्फेक्सन हुने र पछि गएर छालामा दीर्घकालीन असर देखिन्छ।
के गर्ने ?
मेकअप उमेरअनुसार पनि फरक हुन्छ। प्रत्येकको छालाको प्रकृति फरक हुने भएकाले मेकअप गर्दा निकै ध्यान दिनुपर्छ। यस्तै, मौसमअनुसार तथा दिउँसो र राति प्रयोग गरिने मेकअप पनि फरक-फरक हुन्छ।
– सकेसम्म छालाको प्रकृति जाँच गराएर कस्मेटिक प्रयोग गर्नुपर्छ। एकपटक प्रयोग गरेका सामग्रीले समस्या सिर्जना गरेमा फेरि प्रयोगमा ल्याउन हुन्न।
– अरूको सामान प्रयोग नगर्ने, ब्रसहरू सफा गरेर मात्र मेकअप गर्ने गरेमा छालामा आउने समस्याबाट बच्न सकिन्छ।