भारतका पाँच राज्यमा विभिन्न चरणमा भएका निर्वाचनको मतगणना बिहीबार बिहानैदेखि शुरु भएको छ।
अन्तिम मत परिणाम बिहीबार नै सार्वजनिक हुने निर्वाचन आयोगले जनाएको छ। पाँच राज्यका ६९० विधानसभा सिटमा निर्वाचन भएको थियो। पाँचै राज्यमा बिहान ८ बजेदेखि मतगणना शुरु भएको हो।
पाँचमध्ये सबैभन्दा बढी उत्सुकता उत्तरप्रदेशको निर्वाचन परिणाममा छ। यो भारतको सबैभन्दा ठूलो क्षेत्रफल र जनसंख्या भएको प्रदेश पनि हो।
उत्तरप्रदेशका सबै ४०३ विधानसभा सिटमा चुनाव सम्पन्न भएको छ। उत्तरप्रदेशमा सत्तारुढ भारतीय जनता पार्टी (भाजपा) नै पुनः सत्तामा आउँछ कि विपक्षी समाजवादी पार्टी भन्नेमा धेरैको तिखो नजर छ। केही गरी भाजपाले उत्तरप्रदेशको सत्ता गुमायो भने त्यसको असर केन्द्र सरकारमा पनि पर्नेछ। र, प्रधानमन्त्री नरेन्द्र मोदीको अलोकप्रियताको मानक बन्नेछ।
यस्तै, ११७ सिट भएको पञ्जाब विधानसभा निर्वाचन परिणामलाई पनि धेरैले उत्सुकताका साथ हेरेका छन्। खासगरी, दिल्लीमा सत्तारुढ आम आदमी पार्टीले पञ्जाबमा सरकार बनाउने सम्भावनाका रूपमा यसपटकको निर्वाचनलाई लिइएको छ।
पहाडी राज्य उत्तराखण्डका ७० सिटको निर्वाचन परिणाम पनि बिहीबार नै सार्वजनिक हुनेछ। यहाँ कंग्रेस–आई र भाजपाबीच कडा चुनावी टक्करको अनुमान छ। गोवाका ४० र मणिपुरका ६० विधानसभा सिटको निर्वाचन परिणाम पनि बिहीबार नै सार्वजनिक हुनेछ।