काठमाडौँ । पश्चिम बागलुङका नागरिकलाई सहजताका लागि बुर्तिबाङमा स्थापना गरिएको मालपोत कार्यालयमा कर्मचारी नहुँदा सेवाग्राहीले समस्यामा परेका छन् । अहिले कार्यालय एक सुब्बाको भरमा चलेको छ ।
बुधबार मात्रै एक जना सुब्बा थपिएका हुन् । कार्यालय प्रमुख दिलबहादुर केसी यही फागुन ३ गते जिल्ला कारागार बागलुङमा सरुवा भएपछि कर्मचारी अभावमा काम गर्न समस्या भएको हो । तेह्र कर्मचारको दरबन्दी रहेको यस कार्यालयमा अहिले दुई सुब्बा, तीन कार्यालय सहयोगी र दुई कम्युटर अपरेटर रहेको नायब सुब्बा कासीराम खड्काले बताए ।
उनले अहिले एक नायब सुब्बा आएपछि केही सहज भएको जानकारी दिए । उनले केही समय आफू एक्लै काम गर्दा प्रभावकारी सेवा प्रदान गर्न समस्या भएको बताए ।
हाल कार्यरत दुई कम्प्युटर अपरेटर कराका हुन् । स्थायी कर्मचारी छैनन् । तीन कार्यालय सहयोगीमध्ये एक मात्रै स्थायी हुन् । कार्यालयमा एक अधिकृत, तीन खरिदार, तीन नासु र एक लेखा अधिकृतको पद खाली रहेको उनको भनाइ छ ।
मालपोत कार्यालयमा दैनिक २०–२५ जनासम्म सेवाग्राही आउने गर्छन् । गाउँगाउँबाट आएका नागरिक समयमा काम नसकिएर तीन चार दिनसम्म बजारमा बस्नु पर्ने बाध्यता रहेको खड्काले बताए । उनले कर्मचारी नहुँदा यो अवस्था सिर्जना भएको जानकारी दिए ।