काठमाडौँ । सार्वजनिक यातायात केन्द्रीय महासंघ नेपालले आन्दोलनको घोषणा गरेको छ । पेट्रोलियम पदार्थको मूल्य वृद्धि तत्काल फिर्ता लिई भाडा समायोजन गर्न माग गर्दै आन्दोलनको घोषणा गरेको हो ।
रिपोर्टर्स क्लब नेपालमा आज पत्रकार सम्मेलन गरी हप्ता दिनभित्र समस्या समाधान नभएमा आगामी चैत्र १ गतेदेखि आन्दोलनमा जाने घोषणा गरेको हो ।
महासंघले हाल कायम भाडा दरमा अन्तर प्रदेश र प्रदेश स्तरीय रुटमा न्युनतम २६ प्रतिशतले वृद्धि गर्न र ट्याक्सीको हकमा सुरुवाती ८० रुपैयाँ तथा भाडा प्रति किलोमिटर ६० रुपैयाँ दरले समायोजन गर्न सरकारसँग माग गरेको हो ।
महासंघका अध्यक्ष डोलनाथ खनालले अन्तिमपटक भन्दै सरकारलाई सात दिनको समय अवधिमा माग सम्बोधन गर्न आग्रह गरेको बताए । उनले पेट्रोलियम पदार्थको मूल्य वृद्धिको आधारमा भाडा तत्काल समायोजन गर्न सरकारसँग माग गरे । अध्यक्ष खनालले विगतजस्तै आन्दोलनको निमित्त सात दिने सरकारलाई अल्टिमेटम दिएको सुनाए ।
उनले केन्द्रीय सरकारदेखि प्रदेश सरकारसम्म, वर्तमानदेखि पूर्वसम्म, पहिलादेखि हालसम्म सरकारमा रहनेले निजी क्षेत्रका कुनै नीति निर्माण नगरी पलायन गराउन खोजेको आरोप लगाए । उनले भने, ‘केन्द्रीय सरकारदेखि प्रदेश सरकारसम्म, वर्तमानदेखि अहिलेका सरकारसम्म रहनेले निजी क्षेत्रका कुनै नीति निर्माण नगरी पलायन गराउने, लगानी ध्वस्त बनाउने, यसप्रति साझा दृष्टिकोण नबनाउने र आफै तड्पिएर कमजोर भएर जाने परिस्थितिको सृजना भएको छ ।’
उनले २०६५ सालमा यातायात क्षेत्रमा सरकारले एउटा भाडा नीति बनाएको उल्लेख गरे । सोही नीतिको आधारमा गत असारसम्म भाडादर कायम भइरहेको उनले बताए । विगत ६ वर्षसम्म आइपुग्दा बागमती प्रदेशमा ट्याक्सीको भाडा अहिलेसम्म समायोजन हुन नसकेको पनि उनले स्पष्ट पारे । उनले भने, ‘०७३ देखि ट्याक्सीको भाडा अहिलेसम्म समायोजन हुन सकेको छैन ।’
संघीय सरकारले गत असार २८ गते भाडा समायोजन गर्दा डिजेलको मूल्य प्रतिलिटर १०७ रुपैयाँ रहेको र तत्पश्चात पटक–पटक मूल्य वृद्धि भएको बताए । असार २८ गतेपछि २७ रुपैयाँ पेट्रोलियम पदार्थको मूल्य बढे पनि आजसम्म भाडा समायोजन नगरेको उनले गुनासो पोखे ।
चैत्र १ गतेबाट आफूले आन्दोलन गर्ने, त्यसबाट पर्ने कठिनाई र जिम्मेवारी राज्यले लिन पर्ने उनले बताए । आजमात्रै सम्बन्धित मन्त्रालयमा गई मन्त्रीलाई ज्ञापन पत्र बुझाएर आएको उनले सुनाए ।
उनले हवाइ यातायातमा पेट्रोलियम पदार्थको मूल्य वृद्धि भएको २४ घण्टामा हवाई भाडा बढ्ने तर आफूहरुको नबढेको भन्दै आपत्ति जनाए ।