कैलाली– सुदुरपश्चिम प्रदेश सरकारका मुख्यमन्त्री कमल बहादुर शाहले प्रदेश सरकार टिकाइराख्न स्वतन्त्र सांम्सद डाक्टर तारा जोशीको साथ मागेका छन।
धनगढीको चैतन्य पाठशालामा आयोजना भएको क्याप्टेन बेद उप्रेतीद्वारा लिखित “भुस्वर्गका परिकल्पना सुदुरपश्चिम नेपाल” नामक पुस्तक विमर्श कार्यक्रममा बोल्दै प्रमुख अतिथि शाहले सुन्दर सुदुरपश्चिम बनाउने अभियान तपाईं हाम्रै भएकोले अहिलेको सरकारलाई समर्थन गर्दै सरकारमा आउन आग्रह गरे।
मुख्यमन्त्री शाहले किताबमा समेटिएको बिषयले सुदुरपश्चिममा पर्यटनको प्रचुर सम्भावना रहेको बताउदै प्रदेश सरकार समेत पर्यटन भित्र्यानका लागि हरसम्भव प्रयासरत रहेको बताए।
कार्यक्रममा बोल्दै स्वतन्त्र प्रदेश साम्सद डाक्टर तारा जोशीले आफ्नो पदको लालसा त्यागे मात्रै पर्यटन बिकासको सम्भावना रहेको बताए। उनले कार्यकर्ता खुशीपार्ने काम मात्रै नगरेर समग्र प्रदेशको बिकासका मुद्दामा सबैदल एकठाउमा आउनुको बिकल्प नरहेको बताए।
यस्तै, धनगढी उपमहानगरपालिकाका मेयर गोपाल हमालले गोरो छाला मात्रै पर्यटन नभएको बताउदै भारतबाट समेत पर्यटन भित्र्याउन पुर्वाधारका साथै सुरक्षाको समेत प्रत्याभूति दिलाउन प्रदेश सरकार सक्रिय भएर लाग्नुपर्ने बताए।
क्याप्टेन उप्रेतीको पुस्तकले यहाँका थुप्रै पर्यटन स्थलहरुको परिकल्पनाले छर्लङ्ग पारेको बताउदै मेयर हमालले पर्यटनको क्षेत्रमा धनगढी उपमहानगरपालिका सदैव सकारात्मक रुपमा लागिपरेको रहेको बताए। पुस्तकका बारेमा प्राध्यापक सिताराम जोशीले सरलीकरण गरेका थिए।
यसअघि पुस्तकको विमोचन भने गत साता काठमाडौंमा पुर्व प्रधानमन्त्री शेर बहादुर देउवाले गरेका थिए।