काठमाडौँ । सुदूरपश्चिमको विकासमा चासो राख्दै धनगढीमा एक अन्तक्रिया गरेको छ । सुदूरपश्चिम क्षेत्रमा प्रदेश सरकार, स्थानीय तह र राजनीतिक दलले निर्वाह गरेको भूमिकाबारे चासो व्यक्त गरिएको हो ।
समारोहलाई सम्बोधन गर्दै सुदूरपश्चिम प्रदेश कांग्रेस संसदीय दलका नेता डा. रणबहादुर रावलले प्रदेश सरकार भ्रष्टाचामा चुर्लुम्म डुबेको आरोप लगाए । उनले प्रतिपक्षी दलले जति खबरदारी गरे पनि मुख्यमन्त्री त्रिलोचन भट्ट र उनको सरकार कानमा तेल हालेर बसेको आरोप लगाए ।
समारोहलाई भौतिक योजना मन्त्री दीर्घराज सोडारीले पनि सम्बोधन गर्दै सरकारले सक्दो प्रयास गरिरहेको बताए । समारोहमा सहभागी बुद्धिजिवी एवं स्थानीयवासीले केन्द्र सरकारको हेपाह प्रवृतिका कारण सुदूरपश्चिम अघि बढ्न नसकेको गुनासो गरेका थिए ।
समारोहलाई सम्बोधन गर्दै धनगढी उपमहानगरका मेयर नृप वडले प्राइम टाइम्स टेलिभिजनले सुदूरपश्चिम प्रदेशमा राखेको चासोप्रति धन्यवाद दिए । उनले आफ्नो कार्यकालमा सुशासन, विकास, जनताका अधिकार र जनपक्षीय काम भएको दाबी गरे ।
समारोहलाई सम्बोधन गर्दै रिर्पोटर्स क्लबका अध्यक्ष ऋषि धमलाले सुदूरपश्चिमका विकास गतिविधि, स्थानीय र प्रदेश सरकार तथा दलको भूमिकामाथि टेलिभिजनले सधैं खबरदारी गर्ने जानकारी दिए । उनले विकासको प्रमुख समस्या भ्रष्टाचार भएकाले त्यसको समूल अन्त्यका लागि सबै एकबद्ध हुनु पर्ने धारणा राखे ।