स्मार्टफोन निर्माता बहुराष्ट्रिय कम्पनी सामसुङले रुसमा आफ्ना सामानको बिक्री बन्द गरेको छ।
युक्रेनमाथि रुसको आक्रमणको विरोध गर्दै सामसुङले रुसमा आफ्ना स्मार्टफोन र चिपको बिक्री बन्द गरेको हो। ‘मौजुदा भूराजनीतिक स्थितिलाई मध्यनजर गर्दै रुसमा बिक्री बन्द गरेका छौँ,’ सामसुङले भनेको छ, ‘यस जटिल स्थितिमाथि निरन्तर ध्यान केन्द्रित गर्नेछौँ। र थप निर्णय लिनेछौँ।’
दक्षिण कोरियामा मुख्य आधार रहेको सामसुङ रुसमा सबैभन्दा बढी बिक्री हुने स्मार्टफोन ब्रान्ड हो। त्यसपछि मात्र चीनको साओमी र अमेरिकाको एप्पल रुसमा बिक्री हुन्छन्। यस्तै, युक्रेनमा मानवीय सहायता निम्ति सामसुङले ६० लाख डलर मद्दत गर्ने भएको छ।
यसअघि माइक्रोसफ्टलगायत बहुराष्ट्रिय कम्पनीहरूले रुसमा आफ्ना उत्पादनको बिक्री बन्द गरेका थिए। हर्मिस, केरिङ र सनेलजस्ता लक्जरी सामानको निर्माता कम्पनीले पनि रुसमा सामान बिक्री बन्द गरेका छन्। कार्ल्सबर्ग बियर उत्पादक डेनमार्कको कम्पनीले पनि रुसमा हुने निर्यात बन्द गरेको छ।