काठमाडौं– लुम्बिनी र सुदूरपश्चिम जोड्ने कर्णाली चिसापानीस्थित पुलमा एक ट्रकमा लागेको आगो अझै नियन्त्रणमा आएको छैन।
लाइटर बोकेको ट्रकमा आगो लागेका कारण नियन्त्रणमा लिन कठिनाइ भइरहेको प्रहरीले जनाएको छ।
कर्णाली पुलको लठ्ठामा लागेको आगो भने नियन्त्रणमा आएको छ।
आइतबार दिउँसो बर्दिया र कैलाली जोड्ने पूर्व–पश्चिम राजमार्ग चिसापानीअन्तर्गत कर्णाली पुलमाथि आइपुग्दा अचानक ना५ख ९२५७ नम्बरको ट्रकमा आगलागी भएको थियो।
ट्रकमा लागेको आगोले पुलमा समेत क्षति पुगेकाले अहिलेलाई आवागमन बन्द गरिएको सडक डिभिजन कार्यालय नेपालगञ्जका प्रमुख इन्जिनियर निरज शाक्यले बताए।
जिल्ला प्रहरी कार्यालय कैलालीका प्रवक्ता डीएसपी कुलदीप चन्दका अनुसार अझै पूर्ण रूपमा आगलागी नियन्त्रणमा आएको छैन। डीएसपी चन्दले लम्किचुहा नगरपालिकाको दमकल, नेपाल प्रहरी, नेपाली सेना, सशस्त्र प्रहरी र स्थानीयको सहयोगमा आगो नियन्त्रणमा लिने प्रयास भैरहेको बताए।