काठमाडौँ । पोखरामा बर्डफ्लू भेटिएको छ । पोखरा महानगरपालिका १५ र १७ का घरपालुवा पंक्षीमा बर्डफ्लु भेटिएको हो ।
ती वडामा खटिएको प्रविधियुक्त टोलीले दुई सयभन्दा बढी संख्यामा कुखुरा, हाँस र बट्टाईसहित प्रयोग हुने दाना, मललगायतका पक्षी र पक्षीजन्य पदार्थ नष्ट गरिएको जिल्ला बर्डफ्लु रोग नियन्त्रण समिति कास्कीका सञ्चार अधिकृत डा. ग्रीष्म न्यौपानेले जानकारी दिए । उनले भने, ‘उक्त क्षेत्रमा व्यावसायिक फार्म नभए पनि खुला जग्गा र घरको छतमा राखेर पाल्ने संख्या सोचेभन्दा बढी भेटिएको छ ।’ उक्त स्थानमा फागुन २७ गतेसम्म पक्षी र पक्षीजन्य पदार्थको ओसारपसार रोक लगाइएको छ ।
पोखरा १५ सीताराम पुल नजिक सिद्धिमार्ग अलस्कापुर टोलका खुशीमान गुरुङ र पोखरा १७ घारीपाटन हिमाल दूध डेरी नजिक खेमबहादुर क्षेत्रीले पालेको स्थानीय जातका कुखुरामा बर्डफ्लु भाइरस देखिएको बताइएको छ । स्थानीयवासी खुशीमान र खेमबहादुरले घरमा पालेका कुखुरा र हाँस धमाधम मर्न थालेपछि जिल्ला प्रयोगशालामा ल्याई आरडिटी परीक्षण गर्दा पोजेटिभ देखिएसँगै थप परीक्षणका लागि काठमाडौँ पठाइएको थियो ।
सञ्चार अधिकृत न्यौपानेका अनुसार संक्रमण देखिएको स्थानलाई इपिसेन्टर मानेर चार किल्ला निर्धारण गरिएको छ । स्थानीय जनप्रतिनिधिको रोहवरमा जिल्ला भेटेरिनरी अस्पताल तथा पशुविज्ञ केन्द्रका प्राविधिक, प्रहरीसहितको टोलीले पक्षी र पक्षीजन्य पदार्थ नष्ट गर्ने अभियान सञ्चालन गरेको हो ।