युक्रेनमाथि आक्रमण गरेको विरुद्ध रुसप्रति अमेरिका आक्रामक देखिएको छ। रुसबाट हुने सबै उडानमा अमेरिकाले प्रतिबन्ध लगाएको छ। साथमा, युक्रेनलाई ३५ करोड डलरका हतियार पठाउने भएको छ।

मंगलबार राति अमेरिकी संसदलाई सम्बोधन गर्दै राष्ट्रपति जो बाइडेनले उक्त घोषणा गरेका हुन्। बाइडेनले युक्रेनलाई ५.४ करोड डलरको मानवीय सहायता घोषणा पनि गरे।

यस्तै, अमेरिकाले रुसका बैंकहरूलाई विश्वव्यापी स्विफ्ट म्यासेजिङ प्रणालीबाट पनि हटाएको छ। त्यसबाट रुसी केन्द्रीय बैंकलाई आफ्नो मुद्रा रुबेलको मूल्यमा तीव्र गिरावटको संकट सामना गर्नुपरेको छ।

यस्तै, रुसको कुलीनतन्त्रका सदस्य र समर्थकहरूको अमेरिकामा रहेको सम्पत्ति जफत गर्ने घोषणा पनि अमेरिकाले गरेको छ। त्यसका लागि ट्रान्स एटलान्टिक टास्क फोर्समा अमेरिका सामेल भएको छ।

रुसी विमानहरूलाई अमेरिकी हवाई क्षेत्रमा पूर्ण प्रतिबन्ध लगाइएको छ। त्यसमा कमर्सियल मात्र नभई रुसका निजी विमान पनि अमेरिकी आकाशमा प्रवेश गर्न नपाउने भएका छन्। राष्ट्रपति बाइडेनले युक्रेनलाई मानवीय सहायतका लागि ६.४ अर्ब डलर थप उपलब्ध गराउने प्रस्ताव संसद सामु गरेका छन्।

रुसमाथि धमाधम प्रतिबन्धका बावजुद अमेरिकाले युक्रेनमा आफ्नो सेना भने नपठाउने भएको छ।

रुसलाई विश्व समुदायबाट पूर्ण रूपमा अलगथलग बनाउने रणनीतिमा अमेरिका देखिएको छ, जसका कारण रुसी अर्थतन्त्र धरासायी बन्ने सम्भावना छ। हालसम्म रुसी मुद्रा रुबेलको मूल्यमा ३० देखि ४० प्रतिशतसम्म गिरावट आइसकेको छ।

राष्ट्रपति बाइडेनले अमेरिकीहरूलाई युक्रेनका नागरिकबाट प्रेरणा लिन आग्रह गरे। ‘पुटिनले ट्यांकहरूबाट युक्रेनको राजधानी किभलाई घेर्न सक्छन् तर उनले युक्रेनी नागरिकको दिल जित्न सक्दैनन्,’ उनले भने।

रुसविरुद्ध पश्चिमा विश्व एकजुट रहेको सन्देश बाइडेनले सम्बोधनका क्रममा दिन खोजे। ‘कुनै तानाशाह जबसम्म आफ्नो आक्रमणको चर्को मूल्य चुकाउँदैन, तबसम्म अराजकता पैदा गरिरहन्छ,’ बाइडेनले भने, ‘हामीले सबै संकटबाट पार भएको देख्नेछौँ। र, इतिहासमा लेखिने छ, युक्रेनविरुद्ध आक्रमण गरेको रुस धेरै कमजोर अनि त्यसबाहेकको विश्व अझ बलियो भएको हुनेछ।’

रुसी राष्ट्रपति भ्लादिमिर पुटिनले स्वतन्त्र दुनियाँको अमनचयन भंग गर्न खोजेको उल्लेख गर्दै बाइडेनले भने, ‘उनले सोचे आफ्नो खतरनाक तरिकाबाट सारा संसारलाई झुकाउन सक्छु। तर, उनको त्यो गलत आकलन थियो।’