युक्रेनले रुसविरुद्ध इन्टरनेसनल कोर्ट अफ जस्टिसमा उजुरी हालेको छ। ट्विटमार्फत युक्रेनका राष्ट्रपति भोलोदिमिर जेलेन्स्कीले यसबारे जानकारी दिएका हुन्।
युक्रेनमाथि आक्रमणका लागि रुसलाई दोषी ठहर गरिदिन उजुरीमा आग्रह गरिएको छ। ‘हामी इन्टरनेसनल कोर्ट अफ जस्टिससँग आग्रह गर्छौँ, रुसले तत्काल सैन्य कारवाही रोक्न निर्देशन दिइयोस्। हामी अर्को साता नै यस मुद्दामा सुनुवाइ होस् भन्ने चाहन्छौँ,’ उजुरीमा भनिएको छ।
गत बिहीबारदेखि रुसले युक्रेनमा सैन्य आक्रमण शुरु गरेको थियो। त्यसलगत्तै रुसी सेना युक्रेनमा प्रवेश गरेर अन्धाधुन्द आक्रमण गरिरहेको छ। युक्रेनका धेरै शहरमा भिषण युद्ध भइरहको छ।
आइतबार बिहान रुसले वार्ताका लागि बेलारुसमा आउन आग्रह गरेको थियो। युक्रेनले भने बेलारुसमा वार्ताका लागि आउन नसक्ने जवाफ दिएको छ। र, युक्रेनले पोल्यान्डको वार्सामा वार्ता गर्न सकिने बताएको छ। किनकि, बेलारुस रुसको सहयोगी मुलुक हो। र, रुसका हरेक गतिविधिमा बेलारुसले समर्थन गर्दै आएको छ। बेलारुस युक्रेनको उत्तरी छिमेकी पनि हो।