रुसले युक्रेनमाथि निरन्तर गरिरहेको आक्रमणप्रति मौनझैँ बसेका पश्चिमा मुलुकहरू युक्रेनलाई हतियार पठाउने होडमा जुटेका छन्। त्यसैको पछिल्लो कडी हो, युक्रेनलाई हतियार पठाउन २५ वटा मुलुकले गरेको सहमति।
बेलायतका एक उच्च रक्षा अधिकारीले त्यसको पुष्टि गरेका छन्। बेलायती रक्षा मन्त्रालयमा सशस्त्र सेनाहरूका अन्डर सेक्रेटरी हिप्पेले बीबीसीको ‘रेडियो ४ टुडे’ कार्यक्रमलाई अन्तरवार्ता दिँदै युक्रेनलाई हतियार पठाउन २५ वटा पश्चिमा मुलुकबीच सहमति भएको खुलाएका हुन्।
बेलायतले ती मुलुकसँग मिलेर हातहतियारको प्रबन्ध गर्न लागेका उनको भनाइ छ। र, ती हतियार युक्रेनी नागरिकको हातमा थमाइने उनले बताएका छन्। त्यसको विस्तृत विवरण भने उनले खुलाएनन्।
उनको बुझाइमा अहिलेसम्म युक्रेनी सेनाको हातबाट परिस्थिति बाहिरिइसकेको छैन। युक्रेनको राजधानी किभमा सक्रिय सेनामध्ये स्पेसल फोर्स युनिट र प्याराट्रुपर्स रहेको उनको भनाइ छ। बख्तरबन्द टुकडीहरू शहरभन्दा टाढाको इलाकामा तैनाथ रहेको उनले दाबी गरे।
हिप्पेले युक्रेनी सेनाको प्रशंसा गरेका छन्। र, रुसविरुद्ध बहादुरीपूर्वक लडिरहेको बताएका छन्।