विराटनगर– कोशी प्रदेशका मुख्यमन्त्री उद्धव थापाले सभाध्यक्षकाे पनि मत लिएर विश्वासको मत लिएपछि नेकपा एमाले त्यसकाे बदरको मागसहित सर्वोच्च अदालत जाने भएको छ।
सत्ता गठबन्धनबाट मुख्यमन्त्री बनेका उद्धव थापाले हिजो सभाध्यक्षकाे समेत मत लिएर विश्वासको मत प्राप्त गरेका थिए।
एमालेकाे अवराेधका बाबजुद् सभाध्यक्ष इसमाइल मन्सुरीले आफूले पनि मत हालेर मुख्यमन्त्री थापाले विश्वासको मत पाएको घोषणा गरेका थिए।
एमाले कोशी प्रदेश संसदीय दलका नेता हिक्मत कार्कीले प्रदेश नियमावली र संविधानलाई छलेर थापाले विश्वासको मत पाएको घोषणा गरिएको भन्दै सर्वाेच्च अदालत जाने तयारी भएको बताएका छन्।
‘प्रदेश नियमावली र संविधानका धारा छलेर जाने ठाउँ छैन, त्यसविरुद्ध हामी कोर्ट जान्छौं, हामीसँग अर्को विकल्प छैन’, प्रेस चौतारी नेपाल कोशी प्रदेश कमिटीको प्रथम साधारणसभामा उनले भने।
एमालेले भोलि नै रिट दर्ता गराउने तयारी गरेकाे छ।