काठमाडौं- कलाकारितामा आफ्नो चरित्रलाई जीवन्त बनाउन कलाकारले गरिरहेको मिहिनेतको चर्चा हुन थालेको छ।
बाहिरी आवरणमा मात्र परिवर्तन ल्याउने कलाकार अहिले चरित्रमा बाँच्न थालेका छन्। ‘डिजिटल प्लेटफर्म’हरूको लोकप्रियता बढेसँगै आफूले वहन गर्ने भूमिकालाई बुझ्न भाषा सिक्ने, स्थानीय बासिन्दासँग घुलमिल हुने, अध्ययन गर्ने शैली अधिकांश नयाँ पिँढीका कलाकारमा देखिन थालेको छ।
प्रायः चलचित्रमा अभिनय उस्तै भएपछि ‘टाइप कास्ट’को आरोप खेपिरहेका नयाँपुस्ताका कलाकार भने मिहिनेती देखिने गरेका छन्। रंगमञ्च हुँदै चलचित्रको पर्दामा देखिएका कलाकार सौगात मल्ल, दयाहाङ राई, विपिन कार्की, प्रमोद अग्रहरीलगायतले आफ्नो चरित्र निर्माणमा गरेको मिहिनेत नयाँ पुस्ताले अनुसरण गर्न थालेको छ।
यद्यपि, उल्लेखित नामलाई बढी व्यावसायिक बनिरहेको आरोप पनि लाग्ने गरेको छ। गत वर्ष प्रदर्शन भएका चलचित्र ‘छड्के २’ मा अभिनेता अनमोल केसी ग्याङगस्टर र ‘प्रकाश’ मा अभिनेता प्रदीप खड्का जुम्लाको गाउँले भूमिकामा देखिए। नेपाली चलचित्रमा सर्वाधिक खोजिने दुई युवापुस्ताका अभिनेताले आफ्नो भूमिकामार्फत देखाएको परिवर्तनको राम्रै चर्चा भयो। व्यावसायिक सफलता भने प्राप्त हुन सकेन।
आफूलाई स्टारडमको छायाँबाट बाहिर आएर जुम्ली युवक बनेपछि पात्रको विविधतासँग परिचित भएको महशुस अभिनेता खड्कालाई छ। उनी सोही चलचित्रमार्फत उत्कृष्ट अभिनेताको अवार्डसमेत जित्न सफल रहे। ‘नयाँ भूमिका खोज्दा प्रकाश पाएँ, चरित्रमा देखिन मैले सक्दो प्रयास गरेको थिएँ। यस्ता चलचित्रमा बारम्बार काम गर्ने मौका मिल्दैन, सदुपयोग गरेको हुँ,’ उनी भन्छन्।
गत वर्ष नै प्रदर्शन भएको ‘झिँगेदाउ’मा अभिनेत्री आँचल शर्माले गाउँले युवती, ‘बाबरी’मा अभिनेता धीरज मगरले पूर्वेली युवक, ‘कृष्ण लीला’मा अभिनेता पुष्प खड्काले अटिजम पीडित युवकको भूमिका वहन गरे।
नयाँ पुस्ताले चरित्र निर्माण गरिरहेको मिहिनेत सकारात्मक रहेको निर्देशक प्रदीप भट्टराई बताउँछन्। भन्छन्, ‘स्टारलाई हेर्न दर्शक हलसम्म आउँछन्। उनीहरूले चरित्रमा गर्ने मिहिनेतले लामो समयसम्म जोगाउँछ।’
हाल प्रदर्शनमा रहेको सिनेमा ‘बगान’मार्फत अभिनय शुरु गरेकी प्रमिला कार्कीले आफूलाई प्रमाणित गरेकी छन्। चलचित्र हेर्न हलसम्म पुगेका विशिष्ट व्यक्तिले समेत उनको अभिनय प्रशंसा गरेका छन्। ‘आफूभन्दा अग्रज कलाकारसँग अभिनय गर्दा उहाँको अनुभवले मलाई चरित्रमा रहन मद्दत गरेको थियो। पर्दामा आफ्नो काम हेर्दा खुशी भएँ नै, साथै प्राप्त प्रतिक्रियाले मलाई आगामी यात्रा तय गर्न सहज भएको छ,’ कार्की भन्छिन्।