कलकारखाना बेच्यौ
बालुवा ढुंगा बेच्यौ
सरकारी जरजमिन बेच्यौ
देशका किल्ला काँटी बेच्यौ
देशको इज्‍जत बेच्यौ

अब केही नपाएर
मान्छेको व्यापार गर्न थाल्यौ

शरणार्थीमा पनि व्यापार खोज्‍ने
गज्‍जब छ
तिमीहरूको लोभ पापले
देश हल्लिएको छ

जेल जाने डरले
मैं हुँ भन्‍नेहरूको पनि
छातिमा ढ्यांग्रो बजेको छ

कहिले विज्ञप्ती निकाल्ने
कहिले ङिच्च अनुहार बनाउँदै
कहिले टीभीमा अन्तरवार्ता
तर कसैले छैन पत्याउने

असली शरणार्थी सत्तोसराप
गर्दै ठिक्क छन्
हाम्रो नाम पनि बेच्‍न
बाँकी नराख्‍ने डाँकाहरू

भुटानका इष्‍टदेवले पनि
तिमीलाई माफ गर्ने छैनन्
भन्दै भाकल हाल्दै छन् रे