काठमाडौं- ज्योतिर्विद् एवं कवि पिताम्बर पौड्यालको ज्योतिःशतकम् बजारमा आएको छ। पोखरा महानगरपालिका-३३ शिववस्तीका उनको पुस्तकमा ज्योतिष विषयका विविध पक्षलाई समेट्ने प्रयास गरिएको छ।
विभिन्न पाँच पल्लवमा विभाजित पुस्तक छन्दोबद्धः संस्कृत तथा नेपाली रचना हो। पौड्यालले ज्योतिषीय विश्लेषणसँगै संस्कृतमा उल्लेखित श्लोकलाई नेपालीमा अनुवाद गरी सरल र जो कोहीले बुझ्ने गरी प्रस्तुत गरेका छन्।
७६ पृष्ठमा समेटिएको पुस्तकको प्रथम पल्लवमा उनले नक्षत्र एवम् राशिबारे उल्लेख गर्दै पञ्चांग र ज्योतिषको विश्लेषण गरेका छन्। दोस्रो पल्लवमा ग्रह विश्लेषण, तेस्रो पल्लवमा षड्वर्ग विश्लेषण, चौथो पल्लवमा संक्षिप्त फलादेश, लग्नादी बाह्र भावबाट प्रश्नावलोकन, भावेश फल, विभिन्न भावस्थित व्ययेश फल, उच्च नीच ग्रह फल र व्याधी मृत्युबारे चर्चा गरिएको छ। पाँचौं पल्लवमा संक्षिप्त राशिफल, वैदिक सम्पदा र नीति श्लोक उल्लेख गरिएको छ।
नेपाल पञ्चांग निर्णायक समितिका सदस्यसचिव सूर्यप्रसाद ढुंगेलले शिक्षाको सूत्रझैं सामान्यबाट जटिलतिर लम्केको यो पुस्तक विशेष गरी ज्योतिष पेशा एवम् पुरेत्याइँ गर्नेहरू र बालज्योतिषीलाई समेत बढी उपयोगी हुने बताए।
३१ जेठ २००८ मा भरतपोखरी-६ बर माझथर (हाल पोखरा महानगर-३३) मा जन्मेका तथा स्वर्गीय खडानन्द र जानुकाका छोरा पौड्यालको यसअघि ज्योतिषसम्बन्धी विभिन्न लेखरचना (२०७२), फलित पञ्चामृतम् पहिलो संस्करण (२०७३), दोस्रो संस्करण (२०७४) र तेस्रो संस्करण (२०७६) प्रकाशित भएका छन्।
शैक्षिक, सामाजिक एवम् राजनीतिक क्षेत्रका दर्जनौं संघसंस्थामा नेतृत्वदायी भूमिका वहन गरेका उनले यसअघि राष्ट्रिय शिक्षा समिति पुरस्कार (२०५२), अन्तर्राष्ट्रिय ज्योतिष भूषण पुरस्कार (२०५६)लगायत राष्ट्रिय एवम् स्थानीय पुरस्कार तथा सम्मान प्राप्त गरिसकेका छन्। प्रातःप्रार्थना, स्तुति एवम् पञ्चयज्ञ, स्तोत्रानुवाद, सर्वदेव पूजा पद्धति, सरल ज्योति उनका प्रकाशोन्मुख कृति हुन्।